毒舌大狀丨王丹妮淪為「階下囚」食煙化殘妝變醜女 坐足兩年冤獄性情大變

由黃子華、謝君豪、王丹妮、廖子妤（Fish）及王敏德等主演，林保怡及谷德昭特別演出、羅孝勇友情演出，《寒戰2》、《梅艷芳》編劇吳煒倫（Jack）首部執導電影作品《毒舌大狀》，鎖定賀歲檔大年三十（2023年1月21日）上映。當中只演過《梅艷芳》嘅Louise喺準備第二部電影《毒舌大狀》時，花咗唔少心機準備事前功夫，務求搣甩上套擔正嘅《梅艷芳》，帶給觀眾一個不一樣嘅王丹妮。

 由於王丹妮喺戲中於一夜之間從模特兒變成階下囚，坐足兩年冤獄令她性情大變，食煙及化醜變殘樣通通有齊，就連手指、腳趾都要填上啡色污糟物，頭髮要散上鹽粉令其看上去更粗糙，塑造出由名模淪為階下囚嘅強烈對比感。對此王丹妮直言：「只要係電影需要以及能突顯出角色，完全無所謂。」王丹妮喺戲中要同懲教人員奮力搏鬥，連導演喊卡後王丹妮仍然情緒激動，眼淚流過不停，事後王丹妮笑稱：「好彩拍前有拉筋熱身，一個打十個都冇問題！」

 王丹妮喺戲中要用手語同囡囡溝通，為咗解鎖新技能，佢特意去上手語初級班並獲頒畢業證書，更自費搵舞台劇演員邵美君老師學戲，務求能做好自己每一個部分，導演特別講到有一日冇王丹妮嘅戲份，但導演叫佢嚟拍攝現場，於法庭內觀察及感受黃子華做戲嘅張力，令佢為翌日拍攝作出準備。不過法庭內「震撼彈」一幕緊接着一幕，相當緊湊，加上黃子華極為好戲，精彩嘅演出，令王丹妮投放真感情，於試戲當日激動地喊咗出嚟，佢撒嬌表示：「我真係覺得自己（曾潔兒）好慘，寶寶不哭。導演好衰，嚇鬼死我。」及後再提到呢場戲時，王丹妮起初以為自己能夠忍得住，但黃子華實在演繹得相當出色，令佢忍唔住爆喊，讚嘆子華神嘅功架令人沉醉在內。

 面對隻手遮天嘅權貴，子華神以三寸不爛之毒舌伸張正義，大律師林涼水（黃子華 飾）以毒舌見稱，喺處理一宗全城關注嘅虐兒案時，佢因一時自負大意而令無辜被告人曾潔兒（王丹妮 飾）蒙受17年冤獄。自此身敗名裂嘅林涼水只好以「旺角價錢，中環質素」貼地服務為平民百姓打官司，直至一次翻案機會出現，佢決定聯同昔日戰友方家軍大律師（楊偲泳 飾）及師爺太子（何啟華 飾）東山再起提出上訴。因案件涉及香港顯赫家族鍾念華（廖子妤 飾）及鍾京頤（栢天男 飾）夫婦，加上鍾家御用法律顧問董大狀（王敏德 飾）嘅下流招數，整個傳媒界、警界、以致司法界都與林涼水為敵，喺勢力懸殊嘅法庭內，林涼水面對主控官金遠山（謝君豪 飾）嘅咄咄進逼，依然無畏無懼，全力以寸嘴與權貴終極舌戰，誓要為無財無勢嘅被告人討回公道!