未知柯震東能否出席電影宣傳 朱軒洋指對方包紮着現身感覺蠻帥

台灣Rapper瘦子E.SO，呢日同新生代演員朱軒洋、林奕嵐出席品牌開幕活動。日前傳出柯震東上月拍劇時受傷破相的消息，令唔少圈中人都相當震驚，而去年曾拍攝柯震東執導嘅電影《黑的教育》，兼憑此片奪下金馬獎最佳男配角嘅朱軒洋，就話喺朋友口中得知柯震東受傷嘅消息，仲話聽到之後自己都嚇咗一跳，雖然都有關心過對方，但就唔知對方現時情況係點。嚟緊《黑的教育》將會開始進行宣傳，朱軒洋話雖然唔知柯震東傷勢係點，同埋到時可唔可以出席宣傳，但佢話如果到時柯震東包住晒出席宣傳，感覺上都幾有型。

而早前喺慶功宴玩得太盡興嘅瘦子，就因為飲醉酒而撞傷咗鼻樑，呢日佢就講返自己受傷經過，仲話其實撞傷嘅當下唔覺有咩問題，直到第二朝起身照鏡見到先知自己受咗傷。講到嚟緊嘅工作，瘦子就話自己2022年嘅前半年都太認真賺錢，所以而家會稍作休息，陪下家人行街使下錢先呀！

至於混血女星林奕嵐，早前被影到同曾奪金鐘獎嘅演員巫建和喺街頭擁吻，事後林奕嵐嘅經理人就話佢正為呢件事而反省中，而呢日林奕嵐出席活動，當然被傳媒問起擁問事件，林奕嵐就話自己同巫建和只係朋友關係，仲話以後會注意一下自己喺街上嘅狀態呀。