由謝雪心、蔡國威、梁凱晴及阮嘉敏擔任主持、一連六集嘅賀年節目《新春開運王》,今(17日)晚起逢周一至周三晚上十點半翡翠台播出,《新春開運王》每集邀請唔同藝人擔任嘉賓,仲有邀請玄學家李丞責、麥玲玲、陳定幫及元海為大家指點迷津,各師傅將帶大家遊走香港各個風水寶地行大運、食遍開運菜及分享兔年十二生肖運程。戴耀明被批命格極端
今(17日)晚呢集,有久違嘅朱咪咪擔任嘉賓主持,由麥玲玲師傅帶領大家去中環行大運。玲玲師傅指坐南向北嘅中環屬純陽之地,理應旺日唔旺夜,而夜夜笙歌嘅蘭桂坊卻恰好相反,箇中甚有玄機。
「新春開運菜」環節則搵嚟視帝譚俊彥(Shaun)、綠葉王戴耀明呢對好兄弟擔任嘉賓,二人當年因拍攝《天命》結緣成為好友,玲玲師傅指命格多金嘅譚俊彥係義氣仔女,年沖月又沖嘅小明則命格較為極端,適宜「走多啲」及「越唔穩定運就會越好」;惟小明多年來因一個原因一直安份守己。
譚俊彥喺節目中將揭開箇中因由,背後大有洋蔥!玲玲師傅又指小明於兔年將遇上60年一次嘅「天合地合」,適宜作重大決定,到底相關決定係咪與結婚有關?譚俊彥生命中更出現咗一個重要嘅貴人,助佢由運程平平變得一帆風順,究竟呢個貴人係邊個?就要密切留意!
聽晚呢集繼續由朱咪咪擔任嘉賓主持,並由李丞責師傅帶大家到流浮山賞花、賞錦鯉、觀鳥同BBQ,原來上述活動皆有助提升運勢。丞丞師傅更會帶大家於香港尋龍點穴,兼摸真‧龍骨沾沾旺氣,相當過癮。
聽晚嗰集視后胡定欣與好姊妹姚子羚將一同享用「新春開運菜」,透過揀食品及寫揮春讓丞丞師傅預測兔年運程。兩位靚女來年事業運相當唔錯,惟姻緣各異,其中一人被批情路上仍須努力,另一人則兩心連結,到底係邊個感情有着落?記得留意《新春開運王》。
《新春開運王》逢周一至三晚上十點半翡翠台播映