有種好男人｜結局周劇情峰迴路轉 Woody得知真相崩潰出走

《有種好男人》嚟到結局周劇情更多變化，除咗一貫輕鬆搞笑元素之外，唔少高潮同衝突場面亦逐一出現。16號晚一集劇情峰迴路轉，Charlie 李佳芯 飾 同日正 馬德鐘 飾喺公開戀情後，原本以為自此發展順利，可惜因為顧迦南 胡諾言 飾質疑Charlie同日正關係，令日正同 Woody 吳偉豪 飾意外得悉佢哋嘅親父子關係。

原來Charlie亡夫當年因不育問題，Woody係人工受孕之下出世，而捐精者正正就係日正，知道真相後嘅日正晴天霹靂，仲懷疑Charlie接近自己嘅意圖而對關係失去信心，而Woody亦對自己被多年蒙在鼓裏不是味兒，對媽咪Charlie怒吼：「你之前唔講，依家都唔使講，講咗我都唔會再信你哋！」仲一怒之下離家出走，令Charlie愛情同親情同時備受考驗。

無論喺《愛‧回家之開心速遞》同贏得唔少好評嘅《回歸》中，Ricco都甚少爆Seed，而今次爆發對佢嚟講就係好大挑戰喇：「其實我一睇到場戲，已經知道對我演繹嚟講係一個大爆發，因為情緒要去到好高漲。去到現場導演同Ali都話呢場係Woody最爆其中一場，所以我拍嗰陣都有啲緊張，驚去唔到個Level。」

Ricco又話現實生活中， 自己係不滿都吞聲忍氣型：「一來驚返唔到轉頭同尷尬，二來我性格比較內向， 好多嘢聽咗唔鍾意我都唔會講出嚟，自己屈住就算。」 

另外噚晚夏中秋 徐榮 飾教娜姐 楊卓娜 飾換燈膽一幕，娜姐一時失足成個人跌入中秋懷抱後嫣然一笑，觀眾睇得肉緊仲直指由女強人變身小鳥依人嘅娜姐甚有女性魅力。佢受訪時就透露扮演到飽受傷歇斯底里嘅中女，再因覓得真愛變返小鳥依人，成個過程過足戲癮：「因為個角色好有層次，每個角色嘅轉折位 對我嚟講都係一種衝擊，因為演戲上大起大落，對演員嚟講係好開心嘅事，係過足戲癮。 好多謝編劇個鋪排，寫到人前歡笑但內裏傷感嘅感覺。」

而喺《輕．功》同《有種》先後同韋家雄及徐榮兩大搞笑高手合作，佢就話最考忍笑功力嘅係家雄喇：「徐榮對戲同私底下好認真，佢都鍾意講笑嘅，但同家雄唔同，家雄係無時無刻爆發笑彈。」

《有種好男人》結局周 晚上20:30 翡翠台