魔法伽利略｜Louis Yan紙筒變紅酒嚇窒大小姐 何依婷馮盈盈示範魔法定科學？

以魔術同科學兩個角度呈現難以解釋眼前事嘅《魔法伽利略》，今晚一集將有「大小姐」 林淑敏同「送水輝」許家傑 VS 鄭衍峰＋陳詩欣 擔任嘉賓，呢集Louis繼續表演神級魔術，首個「複製」魔術已令人相當O嘴。

開始Louis只以一個紙筒同酒杯作道具，之後「無中生有」變出一支紅酒，林淑敏見狀即「大小姐」上身話：「豈有此理，點解我唔見你點變支酒出嚟？！」之後Louis再由一支紅酒「複製」出十多支紅酒，相當誇張。

而呢集第二個魔術，Louis會挑戰人體極限表演「神奇咇糖絕技」，淨係將糖啪入手腕內皮膚 呢個動作，已令現場所有人為之震驚，之後Louis仲隔空運功將糖沿手腕慢慢移動，最後再從 Louis眼中跌返出嚟，再次引爆全場尖叫！主持之一 何依婷 仲關心問佢：「我想睇吓你隻眼有冇事？！」Leonard仲直指：「佢隻眼依家真係紅紅哋。」林淑敏仲嚇到眼都凸：「我咁近距離，都搵唔到一啲破綻呀！」

而Regina亦會大晒「奶漲多」神技，她以「魔法粉末」將細杯鮮奶變成大杯，Eunice見狀就搞笑問：「可唔可以畀啲魔法粉末我？」想知道呢個神奇表演係魔術定係科學？就要記得留意聽晚一集節目喇。

至於10號晚一集嘉賓就由 泳兒＋黎展峯 VS 曾樂彤＋艾妮，呢集Louis首先大玩氣球魔術，除咗將泳兒嘅手機變入氣球之中，又能夠隨意控制氣球高度之外，最神奇係Louis可以隔空拮爆波中波，令 人嘖嘖稱奇。

之後Louis又會化身「神算子」，挑戰同點鈔機鬥快數錢，Louis叫嘉賓將一疊道具鈔票分成兩等份，一份由點鈔機點算，另一份則由Louis本人點算，結果Louis以不足0.1秒的時間， 就可以準確講出鈔票數量，數錢堅係快過點鈔機，相當驚人。至於 馮盈盈 就會大晒「一陽指」，以食指觸摸表面就可以令氣球瞬間爆破，原來背後原理仲非常簡單，留意《魔法伽利略》就知當中徼妙喇。

《魔法伽利略》星期四、五晚22:30 翡翠台