大劉劉鑾雄拍賣77個手袋收益逾2500萬 甘比Hermès珍藏超過1000個

經蘇富比進行嘅「收藏之道：劉鑾雄珍藏絕品手袋（第一部分）」拍賣活動於今早完滿結束。全數77個投資級手袋均被成功拍出，總成交價高達2,522.47萬港元，較事前估價高出54.66%。個別手袋特別受到買家追捧，其成交價較估價高出超過兩倍至五倍。

有接近劉氏的消息人士透露，劉鑾雄先生多年來購買嘅愛馬仕手袋遠遠超出1,500個，純為私人喜好，冇商業成份，全部作為送贈給其母親劉老太、兩名親妹妹及其他家人、不同時期嘅女性朋友(非女友)及不同時期嘅女朋友、以及其他友好嘅小小心意。 呢啲手袋絕大部分均為十分罕有及漂亮嘅款式及顏色，不少都鑲有鑽石白金扣及以珍貴嘅鱷魚皮製作。

直至現在，據估計劉太陳凱韻及屋企人仍然至少珍藏著超過1,000個愛馬仕手袋，絕對稱得上為世界級嘅愛馬仕收藏家。