斷網｜城城新片扮電腦奇才 變網絡達人臨道德抉擇

以黑客入侵作為題材嘅動作犯罪電影《斷網》定喺3月9日正式上映，今日電影公司公佈全新海報同埋預告。新片由鄭保瑞監製、黃慶勳執導，演員就包括郭富城、林家棟同任達華三大影帝，加上譚耀文、黃德斌、賴雅妍、胡子彤、顧定軒同湯怡等人演出，陣容非常鼎盛。

《斷網》講述黑客以驚人速度同技術入侵國際金融機構，飾演網絡專才郭富城同林家棟，同網絡安全調查科督察任達華穿梭網上同現實世界，相互角力鬥智鬥勇，形成非一般嘅警匪網絡戰。新片預告中形容世界將隨時引爆網絡風暴，戲中嘅黑客奮力爭取分秒攻擊網絡，甚至入侵銀行，仲令全港斷網，黑客一個Enter就可以癱瘓所有防線。

郭富城喺戲中扮演電腦奇才，一方面要奮力拯救女兒，另一方面太太賴雅妍又被警方拘捕，面對親情同道德抉擇。佢仲話演出新片引發自己對虛擬世界同使用電腦嘅反思。對近年唔少網絡詐騙案發生，城城今次就化身網絡達人，透過《斷網》提醒大眾需要加強認識，避免墜入網上騙案漩渦。

而喺最新推出嘅個人海報，三位影帝郭富城、林家棟、任達華嘅造型鮮明，而三人合體嘅海報一樣非常有型。