陳柏宇老婆符曉薇平安誕細女晒一家四口合照 曾經歷兩度流產走出陰霾

陳柏宇太太符曉薇（Leanne）結婚5年，婚後育愛女陳羿辰（Abigail），符曉薇想再追B，可惜因不同原因兩度小產，後來佢意外懷上第二胎，漸漸走出陰霾，陳柏宇太太今次養胎特別小心，今日終於宣佈細女Audrey出世，更分享一家四口合照，流露溫馨幸福笑容。

符曉薇喺IG貼出多張相片，指細女Audrey預產期本來係3月21號，目前比預期早咗一星期多啲出世，見細女眼仔碌碌，大晒天然呆表情，相當可愛。

符曉薇2011年因拍攝電影《喜愛夜蒲》與陳柏宇認識，二人開始交往，2017年拉埋天窗，符曉薇曾喺2020年不幸宮外孕，導致一邊輸卵管爆裂，緊急入醫院做手術，前年Leanne再接再厲，成功懷孕後又發現胎兒患上愛德華氏症，最後符曉薇忍痛決定做人工流產，符曉薇拍片講述一年內兩度流產承受嘅極大痛楚及陰影，曾失去再生小朋友嘅勇氣，幸好兩口子有足夠嘅愛同支持彼此共渡難關 。