黃妍新歌赴日拍MV 狂食美食返港前努力減磅

黃妍（Cath）完成個唱後去日本旅行，向來是工作狂嘅黃妍，趁機為新歌《反烏托邦三部曲》拍攝MV，寓娛樂於工作，新歌充滿正能量及陽光感，主題具鼓勵作用，新歌MV將於今日下午6點於黃妍YouTube Channel推出
。

黃妍解釋概念來自日常生活面對嘅困難：「喺我哋生命裡面，經常發生好意外嘅事情或困難，然後我哋會幻想發生烏托邦結局，例如會彈出英雄人物，幫你解決所有問題，面對嘅困境就會迎刃而解，但現實生活中發生嘅機會率少之又少，我哋往往要靠自己去將問題逐一解決，所以呢首歌係想鼓勵大家，不如用自己方法、自己對手建構烏托邦。」

為咗延續村上春樹《1Q84》概念，黃妍呢次跟導演要求加入小說角色：「對《1Q84》中嘅角色——牛河很深刻：樣貌奇醜，為老婆女兒努力工作，但每個人都對佢勁差。我好想將呢個角色放落去，結果導演特別安排一個戴上頭套嘅人演出牛河一角，以幽默、輕鬆嘅手法去表達。」MV特別到日本一個和式房屋去拍攝，黃妍好鍾意呢個安排：「本身係音樂會後放假去日本，但覺得不如順便拍埋MV，因為本身《1Q84》係日本文學，喺MV裡面出現日本畫面，令件事更加立體，成件事係令我好感動。」

繼上回喺英國旅行變開Show，今次去日本變拍MV，黃妍自認係工作狂：「去旅行就順便拍MV，好鍾意呢個安排。」工作以外，黃妍亦有四處遊歷，不僅遇上天清氣朗嘅日子見到富士山，呢趟旅程更遇上櫻花滿開嘅日子，黃妍非常興奮：「我喜歡花，但向來唔會特登去外地賞花，所以當去到見到時，就覺得大自然真係好美麗，心情豁然開朗，煩惱冇晒！」

黃妍向來好為食，今次日本之旅食唔停，「好彩show前有好好地節食，所以有Quota喺日本食，但最後都肥咗。都擔心好似上次英國返嚟脹咗幾個碼，偶爾喺酒店房開YouTube做運動，先未至於肥得太離譜。」黃妍呢日本之旅食咗咁多美食，佢預告之後會出Vlog作介紹。