卓韻芝宣佈與美指梁子賢去年離婚 「婚姻有義」再見亦朋友！

卓韻芝於2019年4月喺颱風「山竹」襲港下，由星級姊妹團送佢出嫁，當時卓韻芝稱自己有一位新偶像，同時亦係丈夫，以為二人打風都打唔甩，今日卓韻芝忽然喺社交平台貼出一張黑白照，稱「愛情有雷，婚姻有義」，二人再見亦朋友！

梁子賢早前憑電影《飯氣攻心》入圍金像獎最佳美術指導，雖然未能獲獎，輸咗俾《風再起時》雷楚雄及黃敏軒，卓韻芝仍戥對方高興，認為能入圍就係肯定，即使去年已離婚，得知前夫獲取提名，佢睇頒獎禮仍覺得「肉緊死人」，典禮翌日亦有互相提醒及勉勵。

卓韻芝坦言未曾想像婚姻會結束，更冇諗過婚姻結束時內心竟然有貢獻感，「上年，我們分開了，兩個人比從前更了解對方，多了一段糊里糊塗的共同記憶，一場離合散聚的共同體驗，情誼不會結束，而是生命裡多容納一個靈魂」，佢跟前夫將永遠係彼此嘅朋友，永遠為對方撐腰，內心小孩純潔如初，繼續約食飯、相約BBQ。

卓韻芝喺分開時曾講過「保重」呢兩個字，不過佢講完又失笑，「好像誇張了。 愛情有雷，婚姻有義。梁子賢，勾過手就是朋友」。卓韻芝曾經公開自己係雙性戀，與梁子賢初次約會後就被求婚，而卓韻芝爽快答應。