文雪兒自1991年淡出娛樂圈後專心照顧家庭,直至2013年戲癮復發,間中客串TVB劇集,文雪兒近排非常開心,皆因兩個愛女都迎來喜事,大女Christy去年一索得男,今年細女Jennifer誕下一子,Jennifer上星期六為兒子Jensen舉行百日宴。
噚晚文雪兒先喺社交平台貼出孫仔相,佢解釋當晚太忙冇影到相,一直等親友send返啲相畀佢,等到而家先同大家分享當晚喜悅,呢日好友蘇珊、Joe Junior及文雪兒親姐元秋亦有出席。
文雪兒祝孫仔Jensen快高長大、精靈活潑,仲特別感謝好友蘇珊打頭陣唱歌, 搞到現場氣氛十分好,相中見文雪兒與現任老公袁慧明一齊跟賓客合照, 更一齊影三代同堂嘅全家福,一家人相處溫馨融洽,老公袁慧明外表斯文。
文雪兒1991年息影結婚,將重心放到家庭,1999年與前夫離婚,獨力撫養兩個女兒,一邊辛苦將女兒湊大,一邊經營美容生意,文雪兒晚年遇上現任老公,於2005年嫁畀任職建築師嘅袁慧明,閒時老公陪佢吃喝玩樂,老公視佢猶如「女王」般愛惜,有時間必定管接管送,愛屋及烏將2位繼女視如己出。