金宣虎首度來港出席見面會 緊張忘記歌詞以廣東話冧fans

韓星金宣虎因演出劇集《海岸村恰恰恰》而人氣急升，但隨即因為前女友捏造騙婚謠言，令佢嘅形象𣊬即插水兼停工，好彩之後得到韓媒為佢平反，逐步重整人氣，仲喺去年開始展開亞洲巡迴見面會。

呢日金宣虎就嚟到香港出席見面會，首度來港見fans嘅佢，除咗吸引香港fans入場外，場內仲有來自菲律賓、印尼、泰國同新加坡嘅fans捧場。

本來金宣虎打算以冧歌打頭陣，但就因為緊張而令佢一度忘記歌詞。嚟得香港少不免要以廣東話吸冧下fans啦，金宣虎就以廣東話講出：「好掛住你哋，多謝。好開心見到你哋。」台下fans聽到當然不停尖叫啦，之後金宣虎用返韓文表示自己唱歌嗰陣，掛住望台下嘅fans而唔記得咗歌詞，又話唔知點解自己嘅心情好緊張，同時又好開心。

大會請嚟 森美 擔任司儀，佢喺台上爆料，話唔少金宣虎嘅fans知道係自己做見面會嘅司儀後，都專程向佢噓寒問暖同補課，叫森美要睇晒金宣虎以前嘅活動片段，森美笑言自己本來愛金宣虎只有80分，但因為跟完金宣虎嘅fans後，愛佢嘅程度即升為90分，令到金宣虎大笑。

講到今次嚟香港，金宣虎表示有把握機會去星光大道同蘇豪區嘅璧畫街觀光，又有食下豆腐花同蛋撻。金宣虎又話自己雖然好努力做運動，但係就指成效不大，森美聽到就即刻幫fans謀福利，話有冇成效要除衫先知，不過金宣虎就以「喺呢個場合除衫有點兒哪個」為由拒絕喇，仲叫fans再畀啲時間佢呀。