林宥嘉巡唱破天荒有嘉賓登場 與林家謙合唱未派台歌曲

林宥嘉一連三場嘅巡迴演唱香港站完滿結束，呢晚尾場嚟捧場嘅有黃妍、馬天佑、鄧小巧同魏浚笙等。

一直以嚟都冇喺巡唱邀請嘉賓嘅Yoga，呢次尾場破天荒邀請咗曾經作咗《壞與更壞》呢首歌畀佢嘅林家謙嚟做嘉賓，佢哋仲喺台上唱出未派台新歌《瑪利晚安了》同《飛》畀觀眾，令大家相當驚喜。家謙喺台上話好多謝Yoga之前透過視訊嚟做佢台北演唱會嘅嘉賓，又話之前自己做演唱會時，因為發生咗啲事而導致壓力好大，幸好當時Yoga同佢講咗陣電話，畀咗好多鼓勵自己，家謙以「送鼓勵」嘅諧音嚟送「朱古力」畀Yoga，然後又話豬仔造型嘅朱古力係代表「祝福你」。

呢晚Yoga喺Encore環節唱出多首歌曲，但由於觀眾仍然耳油未盡，所以遲遲唔肯走，令到本身已經換咗衫嘅Yoga再次出場，仲即場接受fans點唱，當有觀眾大叫Yoga除衫，佢就笑言時間唔多喇，又話唔知對方叫自己除衫100次會唔會成功，但自己就希望對方成功同開心，講完就拉起自己件衫露咗少少腹肌出嚟。

騷後Yoga接受訪問，問到佢會唔會錄製《瑪利晚安了》呢首歌嚟派台？Yoga就話如果要佢一個人唱呢首歌，佢會覺得好有壓力，但如果可以有多一個人同佢分擔一齊唱，就覺得可以試下。

喺演唱會上Yoga提到紅館嘅冷氣好強，覺得如果每年嘅夏天都可以嚟呢度開演唱會一定好MM7，訪問上Yoga再提到呢件事，仲話夏天喺紅館開騷係一件好享受嘅事呀。