好睡好起丨《尋人記》貨車司機感謝救命恩人伍詠薇感嘆：半百歲人冇瞓過覺好

《好睡好起》今晚（16號）播出第8集主題係「尋『睡』記」，三位主持方東昇、黃曉瑩及李曉欣四出尋覓睡眠世界「奇人異士」，其中「渴睡王子」擁有「特異功能」，邊行邊瞓，周圍都可以入睡！採訪隊約佢見面，初次約會已波折重重，究竟發生咩事？「王子」背後又有咩不為人知嘅故事？

今晚一集「尋人記」Mode 回歸，呢啲畫面係咪好有親切感呢？攝製隊又重啟「尋人」Mode！

攝製隊重啟「尋人」Mode，為觀眾搵嚟90年代喺新聞節目中接受睡眠治療嘅貨車司機沈先生，跟進佢患睡眠窒息症廿多年嘅經歷。沈先生較昔日容光煥發，談及當年求醫過程，佢多次感謝救命恩人：「真係幫咗我哋好多，再生父母。」沈先生公開呼籲當局參照大腸癌篩查計劃，鼓勵職業司機接受睡眠測試，減少意外發生機會：「我哋揸大型車嘅係要去做，因為會令好多其他人死亡，唔係剩係你一個人嘅事。」
找來九十年代在新聞節目中接受睡眠治療的貨車司機沈先生。

跟進他患睡眠窒息症廿多年的經歷！

沈先生氣息好似更勝當年喎！

噚晚（15號）呢集講伍詠薇（伍姑娘）及霍啟剛各自受唔同睡眠問題困擾，分別喺方東昇團隊陪同下前往港大心理學系睡眠實驗室測試。伍姑娘喺演藝界縱橫多年，過往曾發表一篇「缺眠感言」稱呢30年演藝生涯，佢覺得快樂又痛苦，痛苦源於睡眠不足，但佢好享受呢種痛苦，有一㮔演員係享受被折磨嘅感覺；伍姑娘直言寧願睡眠不足，亦唔想開工不足：「你唔夠瞓係因為你可以做到女一喎。」伍姑娘常要經歷日夜顛倒拍攝，飽受失眠、磨牙及鼻鼾影響睡眠質素，仲要面對記性變差等問題：「半百歲人，冇瞓過一覺好好嘅覺。你都唔知邊日打邊日，係幾陰公！」

伍姑娘喺方東昇團隊帶領下，去咗港大心理學系睡眠實驗室接受測試。

伍姑娘自封呢個係「線人」Look。

搞咗一大輪先覺覺豬嘅伍姑娘，最終比預期瞓得更長時間。霍啟剛因為太太郭晶晶影響，作息及吃晚飯時間相對穩定。

攝製隊直擊霍啟剛的一天，真係忙到不得了。

「公務王」霍啟剛因太太郭晶晶習慣早睡早起，作息及食晚飯時間相對穩定：「我哋一般喺屋企食飯都早，小朋友都習慣咗六點、六點半要食飯，基本上七點零鐘食完，咁你都有番時間消化。」攝製隊直擊「霍啟剛的一天」當日，啟剛全程甚有效率，但佢仍難掩疲態；原來佢每日雖然有七小時睡眠時間，但經常中途一再扎醒，亦受鼻鼾問題困擾。
霍啟剛臨瞓前有向手機 say no，不過佢個原因好特別。

對於首度喺鏡頭前接受睡眠測試，霍啟剛笑言準備過程似足染髮，相當幽默。伍姑娘則準備周全，「陪瞓枕頭」都有七、八個，就連Pat Pat也有專用枕頭，二人分別喺實驗室瞓天光，均比預期中睡得好；結果顯示，自覺睡眠負債嚴重嘅伍姑娘冇臨床睡眠疾病，但負責評估嘅港大心理學系副教授李馨認為，伍姑娘仍要調整「生理時鐘」：「睇番你 3、5 點先瞓，但起身時間就12點、9點、11點都有。呢啲通常要由起身時間開始train起，因為起身時間可以控制。」至於霍啟剛則被診斷患有中等程度睡眠窒息，佢接受呼吸系統科專科醫生林冰建議戴睡眠機助眠，醫生讚霍啟剛為大眾樹立好榜樣：「公眾人物肯做呢樣嘢，大家接受程度會高好多！」
霍啟剛獲醫生讚賞踏出了作為公眾人物勇敢的第一步。