炎明熹藉父親節向爸爸及姑丈表愛意 罕談感情事稱現階段隨時可拍拖

炎明熹（Gigi）近日接受香港電台第一台《舊日的足跡》訪問，分享幸福家事，講吓做歌手與升學當中如何抉擇，Gigi更透露理想伴侶嘅條件。 父親節將至，Gigi 趁機感謝爸爸同一眾姑丈。

Gigi指自己有5個姑媽，帶大佢就係四姑丈，Gigi稱最近大家見到嘅係五姑丈：「佢哋都將我當係阿女咁疼愛，我幸福滿瀉！爸爸係一名跌打醫生，曾喺鄉間有診所。我喺香港出生，回鄉時就居於診所。我哋家傳做跌打，其實我有興趣，但可惜傳男不傳女，所以小時候我希望與媽媽一樣做護士，幫助及照顧病人。」 

Gigi受訪時多謝爸媽生咗佢，又好感激四姑丈照顧，若果冇四姑丈，大家就唔會認識到炎明熹。「當年我睇到四姑丈同姑媽拉住行李，話要離開汕尾去香港，我嚷着要一齊去，更自己收拾行裝，就係咁跟咗佢哋嚟香港。由幼稚園至初中，我都係跟四姑丈住，後來為咗方便學唱歌，就同五姑丈及姑媽一起生活。」

Gigi自細便與父母分開，坦言當年有唔開心，晚上一關燈就會喺床上喊，後來明白父母要照顧爺爺、嫲嫲及弟妹，所以佢學懂珍惜大家見面時間。「我要肉麻地講：『各位爸爸， 我很喜歡你們，沒有你們，便沒有今日的炎明熹。』祝你哋身體健康、笑口常開。不過聽到我咁肉麻你哋唔好哭，我會做得更加好，同時孝順你哋！」

Gigi原名「王佳恩」係父母從網上搵，後來覺得名字太普通，於是改為「王玲芝」。爸爸不斷替佢改名字，Gigi都唔太喜歡。直至14歲那年，音樂學校嘅改名師傅替佢起咗一個新名字， 話呢個名同佢外形好相襯，結果翻開一睇「炎明熹」呢三個字，Gigi非常喜歡，幸而家人冇介意佢改姓炎。Gigi參加《星夢傳奇》梳咗一個好高且齊陰，像火星人嘅髮型。原來係當時髮型師話冇參賽者願意剪呢個髮型，Gigi回答無所謂，髮型師就一下便落剪，當時Gigi好驚訝，睇咗幾日都覺得好搞笑， 之後Gigi就跟「它」和諧共處，Gigi續道：「初時大家話我來自火星，指我嘅說話同行為怪怪，我又唔覺得，可能係我嘅髮型太似《星空奇遇記》火星人冼樸。多謝各位畀咗呢個稱呼我，讓大家留下深刻印象。」

7月19號係DSE放榜日，問到Gigi有冇諗過先做歌手再升學？Gigi原來同家人討論過呢個問題：「希望一面學習，一面唱歌。唱歌係我熱愛，做起來會有幸福感。讀書亦係需要嘅，要增長知識。兩者一齊進行讓我有多啲空間、多啲想像。我有想過入讀演藝學院，但心儀香港理工大學嘅時裝設計課程。 我喜歡畫畫，可以增加我嘅想像力。如果有一日我唔做歌手，相信可以做一個優秀嘅時裝設計師。」 

對於被稱為「樂壇小天后」，Gigi 笑稱從冇諗過有呢個成績，以前一心只想好似媽咪一樣做護士。「我本來係冇目標嘅人，多數係把家人畀我嘅目標當成自己嘅目標，令佢哋放心讓我前行。而家我對自己要求高，現階段係先將歌唱好。我喜歡梅艷芳前輩，曾有前輩指我跟她相似，我感到驚喜及榮幸。我從網上睇過梅姐嘅演唱會，佢嘅最後演唱會我睇咗兩、三次，加上知道佢嘅經歷，覺得好感動。她唱低音好有感染力；唱快歌時又爆發出強大力量。我都希望能做到像佢一樣。」 

Gigi同時感謝亦師亦友嘅Gin Lee（李幸倪），對方不但傳授歌唱技巧，仲不時送小禮物畀Gigi，例如有消炎效用嘅蜜糖，以及有助紓緩喉嚨不適嘅發光棒等。Gigi參賽期間因緊張而面上長痘痘兼難以入睡，Gin主動給予安慰儼如一位心靈導師。 

被問有冇暗戀過他人，Gigi直認小學時有暗戀別人：「通常係自己未選定，內心會左搖右擺，今日喜歡呢個，聽日喜歡另一個。其實邊類男仔都冇所謂，緣份到就擋都擋唔住。我嘅理想伴侶係一個好人，喜歡我多於我喜歡佢，而且一定要孝順。幾時拍拖我都沒所謂，而家都可以，不過我暫時未遇到。」 

Gigi對於被封為「吸金小天后」，家人亦有教佢理財觀念，「冇錢不能，但有錢都唔係樣樣皆能，所以唔會太聚焦喺金錢上，免得影響自己。四姑丈教我要儲錢，爸媽送我一個有密碼嘅錢箱。我對錢唔太敏感，會請長輩為我理財。我唔知道而家有幾多積蓄，目前嘅注意力集中喺下月放榜日。我校內嘅各科成績都好平均，只係數學比較差啲，但今次公開試，我用咗自己嘅思維邏輯『搞一搞、 算一算、做一做』，我好有信心！」