阿媽唔信我去亞馬遜｜洪永城等足18年圓夢之旅 JB胡美貽深受當地男女歡迎謀發展

由 洪永城 同兩名J2er 胡美貽 仲有 布樂文 主持嘅《阿媽唔信我去亞馬遜》，將正式進入亞馬遜熱帶雨林尋幽探秘， 攝製隊離開瑪瑙斯(Manaus)後，搭足34個鐘頭船去到聖塔倫(Santarem)，仲因為斷網而「與世隔絕」。

幾位主持為打發時間，JB就以香港名物「魷魚絲」以物易物，結果驚喜「換來」巴西美少女抱抱同錫面珠，仲被笑佢異性緣暢旺。JB事後就話自己本身人緣不俗，只係今次出Trip特別誇張：「我喺兩、三個禮拜結識到4至5個女仔，真係預計唔到，可能我一直搞錯market，我應該去南美發展。」

至於Nicole就全力同船上乘客Selfie，仲甚受男士同小朋友歡迎，仲被小朋友誤認為韓星，Nicole笑言：「一 般都係細路女覺得我似韓星，可能因為呢幾年流行K-Pop文化啩，喺亞洲區冇人誤會我， 都係喺南美洲先會。」至於呢次船程嘅難忘事，佢哋就異口同聲表示船上劣食最為深刻，Nicole話：「喺船上面最恐懼嘅時間就係放飯，意粉冇味、黑豆同飯又好似唔熟咁。」 

不過真正戲肉當然係殺入熱帶雨林後，攝製隊喺兩名配備大刀嘅導遊兼保安陪同下進入雨林區，Tony受訪時就話亞馬遜叢林其實危機重重：「有豹啦、小鱷魚，同埋好多有危險性嘅野生動物，所以要有槍同刀傍身，同埋要有保安保護住先可以行入去，亦唔可以亂摸嘢。」

Tony更話呢次拍攝困難重重，淨係雨唔停咁落已經令佢懷疑人生喇：「真係好灰架，你想像日日落雨又冇陽光，拍嘢係會比較差啲，惟有當係風格。」雖然辛苦，不過Tony依然認為非常值得，因為走訪亞馬遜係等足18年嘅夢︰「當年入行，第一個諗住做但做唔成嘅旅遊節目就係亞馬遜。嗰時嘅構想係我着住皮褸、孭住背囊、攞住火把尋找古代文明之源，順便尋寶，呢件事冇準備一世都預備咗大半世。」

等足大半世嘅Tony，呢次行程唔止滿足亦大開眼界，沿途除見識巨型蜘蛛同蜘蛛網、有毒牛 娃同比人更高嘅樹木板根、仲有大量螞蟻窩。Tony仲話導遊傳授咗大量「叢林智慧」：「有一種螞蟻搓碎之後可以做驅蚊劑，同埋如果冇起水上嚟，有啲樹嘅樹根係可以攞水嚟飲，但係要靠一樣嘢去辨識。」Tony个預告會同JB齊齊跳入亞馬遜河，作終極自我挑戰：「呢件事最大危機，就係要無視食人魚同其他不知名生物，喺度扮Enjoy游水。」

《阿媽唔信我去亞馬遜》 星期一至五晚 22:30 J2