劉詩昆事隔65年再登同一比賽舞台 兩歲女盪傷無礙與母四手聯彈

近日俄羅斯局勢緊張，不過國寶級鋼琴家劉詩昆無懼日前嘅兵變事件，遠赴莫斯科為「第17屆柴可夫斯基國際音樂比賽」擔任評判，仲應邀喺開幕儀式演奏。劉詩昆正係呢個被譽為「古典音樂界奧林匹克」比賽，1958年舉行嘅第一屆參賽選手，當時奪得第二名嘅劉詩昆，相隔65年後再次登上演奏舞台，亦先後彈奏鋼琴協奏曲《黃河》第二樂章，仲有由佢改編嘅鋼琴獨奏版《我的祖國》。

今次除咗演奏同擔任評判之外，劉詩昆嘅太太 孫穎 亦都同行，因為由佢一手策劃嘅一場演奏會喺比賽閉幕日舉行。呢場演奏由劉詩昆同孫穎、仲有鋼琴演奏家 高雅 帶領五位PALLAS音樂學院學生王彥婷、朴尚雲、朱琴諾、楊大明同Alexander Yang聯同交嚮樂團演出，而著名結他演奏家 濮小博 就擔任音樂會特別嘉賓。

全場另一囑目焦點，可能係劉詩昆同孫穎嘅寶貝女；只得2歲多嘅劉蓓蓓(貝貝)首次踏上國際舞台演奏，貝貝似乎仲遺傳咗父母優良嘅音樂藝術基因，企喺舞台上亦亳不怯場，仲同媽媽四手聯彈兒歌《幸福拍手》，全場掌聲雷動，為演奏會劃上完美句號。

身兼演出同演奏會總策劃嘅孫穎事後話非常開心：「今次係劉老師相隔65年之後再喺「柴可夫斯基國際音樂比賽」演奏、加上回歸26週年、PALLAS喺疫情咁艱難嘅日子下堅持，所以就策劃咗呢次世界音樂藝術強國表演嘅計劃，可以推動中俄藝術文化。為咗鼓勵學生，本來唔表演嘅我都上台彈奏《我和我的祖國》同《喀秋莎》兩首曲目。今次貝貝都有上台，貝貝而家好有節奏感，仲人生第一次踏上莫斯科演奏廳，全場都開心拍手，感覺真係好夢幻。」

雖然最近莫斯科情況緊張，軍事集團瓦格納發動「正義遊行」，距離莫斯科僅200公里，引起全世界關注。孫穎亦一直留意事態發展，仲感恩事件和平解決，演奏會最終順利完成，佢話：「新聞一出大家都好緊張，我哋都有好多莫斯科朋友，佢哋話成日都有呢類新聞。我爸爸媽媽都有擔心，仲問我有冇避彈衣，為咗佢哋安心，我就答佢哋已經準備咗，之後睇返同佢哋嘅對答，都覺得好好笑。」

其實今次亦發生一段小插曲，貝貝抵達莫斯科第二日，就意外被滾水燙傷鼻樑位置，令孫穎心痛不已，个樂觀指貝貝只係「掛了點小彩」，又大讚乖女話：「貝貝嚟到莫斯科第二日，畀滾水燙傷鼻中間位置，我哋即刻帶佢去專門醫治燙傷嘅兒童醫院，不幸中嘅大幸係貝貝情緒冇乜嘢，因為兩日後就要上台，唔想有疤痕，但係結咗疤之後又唔小心整到傷口，真係令我提心吊膽，我都明白呢啲事不可避免，但係喺繁多嘅事務上遇到意外，我都學習到要好好管理自己的情緒，優化所有事情。」