身體最誠實｜莫醫生邀權威分享腸道健康需知 Ali學會放慢腳步免顧此失彼

由「腫瘤學巨人」 莫樹錦 醫生聯同 李佳芯 何沛珈 同 梁超怡 一齊主持嘅健康資訊節目《身體最誠實》，每集會就唔同健康問題提供飲食、運動、科研、藥物同醫療等方面嘅新資訊。其中好似唔同器官嘅異常狀況，同埋點樣預示可大可小嘅潛在毛病等等都會話俾大家知。

而3號晚播出嘅一集，主題就會圍繞腸道健康問題。「Ali Says」又會分享一個小朋友唔肯放手但就顧此失彼嘅小故事，藉此傳遞「學會放開，唔等如放棄」嘅道理。Ali更以自身經歷分享話：「我近來喺工作上的而且確係放慢咗腳步，但呢段時間反而做咗好多我想做嘅事，人哋眼中嘅低潮，對我嚟講反而係一種得着。」

Ali仲寄語大家話：「今日覺得好緊要嘅事，到咗聽日就會變咗小事，今年再大嘅事， 到咗出年就變咗故事，今日過得唔好講咩聽日吖，一於活在當下。」至於梁超怡今集就會走入球場同熱愛籃球嘅 羅天宇 許家傑 曾展望(GM)做「單腳跳」小測試，最終竟然發現全部人都有拗柴風險！

而莫樹錦醫生就邀請香港中文大學醫學院院長 陳家亮教授 傾偈，探討腸道微生態同大腸癌話題。至於星期二同三兩集內容，會同大家一齊探討「基因與癌症篩查」同「肝臟」，想知更多健康資訊？就要密切留意住《身體最誠實》喇。

《身體最誠實》星期一至三晚22:30 翡翠台