自然系女子日本旅行丨林莎相信一見鍾情 自揭擇偶條件鍾意可愛男生

深受觀眾歡迎嘅旅遊節目《自然系女子日本旅行》，今輯繼續有 暉哥林映暉擔任主持，同嘉賓「啦啦隊女神」林襄、「樂天女孩」張雅涵 以及新加盟嘅「無害女神」林莎，去到日本發掘當地別具特色嘅洗滌心靈體驗。

喺9號晚播出嘅一集，暉哥同林莎首先去到合掌村參觀特色建築，之後又去到東茶屋街欣賞藝伎表演，近距離同藝伎玩遊戲。嚟到重頭戲浸溫泉，兩位靚女換上水着體驗和倉溫泉，一邊欣賞七尾灣美景一邊 Girls' Talk，當暉哥問到林莎嘅擇偶條件時，林莎冧滋滋咁話：「喜歡白白淨淨有點小調皮的那種感覺，外形就喜歡長得比較可愛，眼睛笑起來像孔劉那種會被電到。」林莎話自己相信一見鍾情，仲自信咁話睇到每個男生，就會知道邊個係可以做朋友，邊個係可以做男朋友。

浸完溫泉，暉哥同林莎再體驗當地獨有嘅溫泉泥Spa，將溫熱嘅珪藻土塗喺身上，感覺零舍唔同，暉哥笑言：「過咗半個鐘後成身都係汗，有排毒嘅感覺，做完出嚟都瘦咗！」

而10號晚播出嘅一集，暉哥同林莎將會轉戰加賀市，佢哋會體驗擁有1,300年歷史嘅山代溫泉，兩位靚女去到大眾浴場「古總湯」浸溫泉，該浴場嘅復古裝修相當有特色，價錢亦十分便宜，只需要500日圓(約 28 港元)一位。

加賀有一個傳說，就係只要同兔仔接觸就可以開運， 暉哥同林莎遂到「月兔之里」親親兔仔祈求好運，暉哥話：「我要大紅大紫！」而林莎就表示：「我想《自然系女子》第三季是香港旅行！」兩人仲有幸參與到一年一度嘅百萬石祭，當日祭典現場人山人海，氣氛相當熱鬧。

《自然系女子日本旅行》逢星期一至五 22:30 J2 82台