Gigi新歌初任監製望累積更多經驗 Aska聲沙就醫Yumi投更多讀書時間

炎明熹 鍾柔美 同 張馳豪 呢日齊齊為一個水上音樂會表演，除咗各自分頭演出之外，亦都為現場歌迷合唱。近日推出新作《回甘》嘅Gigi，今次仲首次為新歌擔任監製，不過佢就提到本來希望有更多經驗先再監製作品，不過喺身邊前輩幫忙之下今次就初試牛刀喇。

同樣有新歌推出嘅Yumi，今年踏入中學生活嘅最後一年，新歌《下一年暑假》就啱晒佢心情喇，Yumi就話除咗要面對公開試之外，心情都有啲忐忑﹐不過兼顧學業同工作之下，自己就要再努力多啲喇。

呢晚把聲有啲沙嘅Aska，話正睇醫生同針灸治療，仲對可以同觀眾邊唱邊玩覺得非常過癮咁話呀。