「街市遊樂團」相隔4年Re-U推介香港好去處江美儀最憎邊個藝人？滕麗名努力「造人」中？

TVB新節目《約埋班Friend遊香港》本周一至三晚10點半翡翠台播映，「包美麗僮」相隔4年Re-U推介香港一連三集嘅旅遊節目《約埋班Friend遊香港》，節目由江美儀、滕麗名、麥長青（麥包）及陳浚霆擔任主持。

「包美麗僮」相隔4年再次重聚！

「街僮」陳浚霆被笑指已升呢「街霸」。

麥包近年主力喺內地發展今次難得回港，相約《街市遊樂團》昔日好拍檔江美儀、滕麗名及「街僮」陳浚霆歸隊，為觀眾介紹香港好去處。今晚（9號）播出第一集，「包美麗僮」相隔 4年再次重聚，昔日「街僮」陳浚霆被指升呢「街霸」，故「包美麗僮」已變成「包美麗霸」。

四人大逛懷舊小店。麥包依家究竟幾重呢？陳浚霆學整龍鬚糖。

四人首個行程出發去中環街市逛懷舊小店及歎懷舊美食，麥包見舊式磅重機即急不及待試玩，喺節目公開真實體重，美儀及麥包之後去Pink爆素食餐廳打卡及歎按摩SPA，美儀自爆小秘密：「細個諗住移民去加拿大，爸爸叫我要考牌有番一技之長，我就考咗美容師牌同按摩牌，所以我對按摩好有要求。」跟住四人合體坐船出海歎海鮮，席間大玩爆笑選擇題，氣氛非常歡樂。最後四人響應夜繽紛到灣仔夜市湊熱鬧，邊飲邊食仲欣賞無人機表演。

江美儀帶麥包去到呢間Pink爆嘅素色餐廳打卡。兩人又去咗歎Spa，江美儀自爆有按摩同美容牌。四人上船歎海鮮！

響應夜繽紛，四人到灣仔夜市湊熱鬧。

聽晚（10 日）播出第二集講麥包孖陳浚霆出海玩平板賽艇，浚霆練習期間一度失平衡跌落水，相當遴迍！美儀、麥包及陳浚霆之後去香港海防博物館參觀，麥包透露主持《閃電傳真機》時曾介紹過呢度，美儀及浚霆聞言即嗌佢做前輩，接著到大館參觀兼Happy Hour，飲酒期間大談搞笑醉史，麥包分享因誤交損友一夜花光TVB第一份糧：「嗰時同個朋友去飲酒，佢突然敲鐘萬歲，之後淨番我喺度！」幸好當日係出糧日，麥包最終等到晚上12點撳錢，又問朋友再借100元先成功埋單，美儀聞言：「呢啲朋友就唔好識啦！」

陳浚霆同麥包出海玩平板賽艇。陳浚霆失平衡跌落海。之後佢哋去咗海防博物館參觀。三人又去埋大館。