炎明熹認工作學業壓力大 分享減壓心得正視情緒健康

炎明熹（Gigi）、陳健安及歐鎧淳等近日分別拍片宣揚正視情緒健康，一齊玩問心小遊戲，炎明熹拍片問自己「有冇想休息吓」，坦言早排開咗首個個人演唱會，始終係第一次，心情真係緊張過考試。

炎明熹早前忙住排舞練歌練體能，加上要返學，直認真係幾忙，炎明熹會畀自己休息，跟大家分享自己減壓心得 ：「以前參賽嗰陣都試過，所以我對自己好有信心可以handle到！嚟緊仲有其他工作同學業喺身，有時候一覺得壓力大，我就會搵少少時間發吓佝瞀（發吽豆），放空腦袋，盡量咩都唔好諗，畀自己唞吓，充電先再繼續做嘢！不過呢個方法就未必人人都work。」

炎明熹喺片中呼籲試過好攰想休息，又或者有其他情緒困擾，記得要為自己搵紓壓方法，必要時記得搵專業人士協助，「無論今日過成點，記得花少少時間去聆聽自己嘅內心感受，好好照顧自己同關心身邊有需要嘅人」，「陪我講Shall We Talk」係精神健康諮詢委員會自2020年7月起推行嘅精神健康推廣及公眾教育計劃。