叠影狙擊丨 周秀娜被撻到肋骨斷裂 炎夏着厚特警裝令皮膚敏感復發

周秀娜喺劇集《叠影狙擊》入面有大量動作場面，劇組為咗令娜姐可以好好掌握技巧，喺開拍前特登安排咗佢跟武術指導上堂，原本安排咗一系列課程，令娜姐可以有充分練習，但點知上到第四堂，娜姐就意外受傷，其中一截肋骨仲斷裂！
娜姐喺劇中有唔少動作場面。
雖然受到斷骨之痛，但娜姐仲識講笑，佢回憶受傷情景時表示：「上到第四堂，開始向難度挑戰，學點樣俾人撻底嘅動作，可能我骨頭太脆弱，其中一截肋骨Z型斷開咗，無論我換衫、透氣、笑，都會痛，醫生叮囑一定要休息，但因為套劇要開始拍，所以劇組安排頭兩個月先拍晒啲文戲，所有動作戲留番最尾先拍，等我有多啲時間休息，好在而家已經好返晒！」
因為經常喺炎夏着厚衫拍動作戲，令娜姐皮膚敏感復發。
今次拍劇娜姐可以話多災多難，除咗斷肋骨外，由於經常要喺大熱天時着住厚厚嘅特警套裝，喺高溫嘅大廈天台拍攝動作戲，令娜姐喺拍攝期間皮膚敏感復發，佢話：「全套特警制服著上身，條腰帶要孭住好嘢，支槍最重，好在肋骨已經好番，如果唔係冇可能攞得起支槍，戴完個頭套再戴頭盔，但當你講對白做戲又會移位，但講到尾，最辛苦其實係熱。」
着高踭鞋喺中環狂奔。
除咗打戲外，拍攝期間娜姐另一個挑戰，就係要着住高踭鞋同黃宗澤喺中環奔跑，娜姐表示：「嗰場係一場槍戰，要跑，但我冇諗過，原來我要着一條好飄逸嘅裙、仲着冷衫、同埋高踭鞋喺條街上面跑，大家都知Bosco成日拍戲都做警察、飛虎隊，佢跑速好快，導演開機前專登走埋嚟同我講，想我跑快啲，貼近Bosco嘅速度，因為想個畫面見到我哋一齊跑。」成勁完全到導演要求嘅娜姐，仲畀拍擋Bosco大讚呀。