叱咤頒獎Gigi《Little Magic》成專業推介十大 林智樂XiX同獲生力軍銀獎嘉許

日前先喺新城電台頒獎禮獲得女歌手獎嘅 炎明熹 呢日現身商業電台舉辦嘅叱咤樂壇流行榜頒獎典禮，歌曲《Little Magic》更獲頒發專業推介第十位，冇諗過會得獎嘅Gigi受訪時心情依舊興奮，仲話直至司儀輕哼歌曲先知係自己，仲話會繼續加油努力向歌手獎進發。

Gigi事後亦到場外向一直支持自己嘅歌迷分享喜悅，又話唔會辜負大家對自己嘅期望，會繼續集努力爭取更好成績呀。

相隔16年再獲至尊歌曲獎，亦因為勤力拉票而第二度得我最喜愛男歌手獎嘅 張敬軒 ，無論台上感言定台下訪問，都一樣對最獲大獎無限感觸，而今年擊退前輩勁敵 尹光 ，軒公就指對方讓賽，仲話因為今年有對方同場較量，所以令氣氛生色不少。

Felix獲生力軍男歌手銀獎，不過事前佢就指自己完全冇信心，甚至到廟宇求得下下籤後更完全自覺係陪跑狀態，所以得到銀獎就大感意外喇。同樣得到生力軍組合銀獎嘅 XiX 一樣萬分驚喜，而一手帶大佢哋嘅經理人 Eric Kwok 竟然一送佢哋到場就離開，結果就梗係更加驚喜啦。

陳蕾 呢晚先後得到4個大獎成為大贏家， MC張天賦就指自己得到男歌手銀獎同《世一》得歌曲獎都一樣開心喇。至於 李幸倪 就得女歌手銀獎同一首歌曲獎，佢就認為自己要繼續努力爭取好成績喇。

林家謙 連獲男歌手同唱作人兩個金獎，產量唔算太多嘅佢就話過去一年自信稍低，不過對得到好成績就一樣咁開心喇。