陳敏之媽咪病重望奇蹟出現 堅持承擔龐大醫藥費

啱啱喺17號踏入45歲嘅陳敏之，25號凌晨就喺社交平台分享一張生日相，不過佢嘅帖文就令大家相當擔心，敏之透露媽咪病重當中，生命步入倒數階段。佢話自己從來無諗過呢一刻嚟得咁快，敏之再寫上：「我的生日願望只有一個，祈求天父，俾多一次機會媽咪好番，我好想佢繼續整飯盒俾我帶返公司食，好想佢煲椰子雞湯俾我飲，好想佢鬧我成日飲凍嘢，好想佢打電話俾我，好想佢日鵝夜鵝，好多好想好想好想好想，我真的很痛苦。」字裏行間感受到敏之面對病重媽咪嘅無比痛心。
陳敏之喺社交平台為媽媽集氣。
敏之亦有透露雖然面對龐大嘅醫藥費，但自己都要默默承受，全因佢應承過媽咪一定要媽咪舒服唔好捱苦，所以自己再辛苦都冇所謂。最後，敏之真係好希望有奇蹟出現，希望大家幫媽咪集氣，希望媽咪可以好返。
唔少圈中人留言為敏之同佢媽咪打氣。

敏之對媽咪嘅擔心同無私嘅愛，觸動無數粉絲及圈中人，大家都紛紛留言鼓勵敏之及為陳媽媽打氣，祈求早日康復。敏之好姊妹胡杏兒、龔嘉欣、楊茜堯、胡定欣等都留言送上支持。