陳敏之母親急性血癌離世 透露媽咪一度戰勝病魔

陳敏之喺1月25號喺社交平台貼文，公開媽咪病重消息，生命步入倒數階段，希望大家為媽咪集氣祝福，希望有奇蹟出現。相隔一日，敏之喺網上帶嚟不幸嘅消息，透露媽咪不敵急性血癌離世。

敏之喺貼文交代媽咪死訊，文字間流露不捨之情，過去一段時間，敏之除咗陪伴住媽咪，佢亦特別感激親人好友「在這個艱難的時刻，對媽媽無微不至的照顧和愛」，敏之透露媽媽喺2023年不幸患上急性血癌，經過家人同佢並肩作戰，走過死亡幽谷，家人陪伴喺醫院打仗，敏之讚揚媽咪嘅意志「是一位戰士Super Woman，結果妳打贏這場仗」。

敏之又指媽咪過去一年康復得好好，佢爭取時間去愛媽咪，帶媽咪去食最好嘅嘢。敏之好感恩一家人可以一齊去泰國旅行，佢知道呢個亦是媽咪嘅心願；近年專攻直播帶貨嘅敏之，亦未有現身直播崗位，相信係為咗陪伴病危嘅媽咪走人生最後一程。敏之外公同爸爸喺2003年相斷離世，一年痛失兩位摯親，敏之一度患抑鬱症同壓食症，後尾諗起爸爸臨終前叮囑佢要睇住屋企，照顧好媽咪同弟弟，先努力生活落去，好友得知敏之近日情況，不少圈中好友紛紛留言表達關心，包括胡定欣、姚子羚、森美、吳若希、李佳芯、唐詩詠、鍾嘉欣及陳法拉等送上慰問，希望敏之同家人都能夠節哀，早日走出傷痛。