不如食豪D｜FYY讀碩士遲到當港姐繞場一周 與6號合作《後生仔》爆多年瘡疤

由 陸浩明 同名廚 楊尚友 主持嘅 J2 14集自家製旗艦綜藝節目《不如食豪 D》，今明一連兩集將由近日正攻讀碩士學位嘅港姐冠軍級人馬 馮盈盈 擔任嘉賓，楊尚友以名貴西班牙紅蝦同貴腐甜酒，配上FYY媽咪製作嘅蘿蔔糕，製作出「紅蔔艦」（西班牙紅蝦配馮家家傳蘿蔔糕）仲有甜品「今晚燉梨」(法國甜酒燉梨配希臘乳酪、燕麥片)。

大學時修讀營養學嘅FYY素有「馮營養」稱號，正修讀食品管理學碩士嘅佢，就連拍攝空檔都會把握時間做功課，早前又公開上學期非常不俗嘅成績。不過佢亦笑言每次返學做presentation時，都有唔少笑料︰「做presentation真係好似做台慶司儀咁，再present整嘅食物。」

馮盈盈帶埋家傳絕技為《不如食豪D》擔任嘉賓

FYY自爆曾為教授煮一道「藍莓醬加米飯布甸」，可惜未能攞A，又反問6號︰「唔煮嗰科攞 A，畀教授食完我手勢嗰科就冇，點解會咁嘅？」6號聞言妙答︰ 「可能大家專注食你煮嘅嘢，無聽你嘅presentation。」

節目中FYY又自爆返學趣聞，佢話因工作關係不時會上堂遲到，咁就要港姐上身應付喇，佢自豪咁話︰「你知啦工作繁忙，上堂時間又早，遲到少少梗有。當人哋準時坐晒喺度，自己要 坐第一排，仲要full make up嘅時候，嗰時就要好似當選繞場一周嘅感覺，毫不尷尬無問題。」

呢日佢仲分享碩士課程嘅返學趣事

佢又指同學仔同教授都非常友善，唔少更係TVB Fans，放break時又會要求合照。而FYY修讀食物營養學及管理的起因，原來同自少有病嘅細佬有關，佢感慨咁話︰「細佬幾歲時嗰腎有問題，飲食要低鈉，嗰時屋企都唔識，以為低即係無，所以一滴鹽都唔落。」

FYY仲爆同6號之間嘅多年情仇

而每當家人都大魚大肉時，弟弟每餐都只能食白飯、白烚雞翼同菜。 令佢萌生修讀營養學，幫弟弟重拾飲食樂趣。 此外，6號因為曾同FYY合作《後生仔傾下偈》而稔熟，當時原來發生唔少不為人知，甚至唔出得街嘅趣聞，今次仲喺《不如食豪D》互揭瘡疤，FYY仲爆6號同女友經常放閃已達「人神共憤」程度呀。

6號同女友之間嘅放閃已達人神共憤程度

《不如食豪D》星期一至五晚 21:30 J2(82台)