彭美施新作品起用三生三旦 目標帶領粵劇闖進拉斯維加斯

彭美施任出品人暨總策劃嘅第七部粵劇作品，嚟緊將喺西九戲曲中心上演，今次施姐嘗試同一齣劇起用三對當今炙手可熱嘅文武生同花旦演出唔同場次，包括打頭陣演出嘅李秋元同梁燕飛，王志良同林穎施，而梁兆明同梁非同「雙梁配」就會壓軸演出。

雖然今次三生三旦合演同一齣劇，但雙梁配就唔擔心會有比較，反而覺得大家可以互相交流、切磋。而梁燕飛就話白蛇對花旦來講係考牌戲，因為有文有武，有齊所有元素，李秋元都覺得係好大挑戰；當中最有經驗嘅一定係林穎施，事關佢演白蛇經驗豐富，起碼超過20次，同王志良已經合作三次，白蛇可以話係一路陪伴自己成長！

施姐為咗今次演出費盡心思，除咗製作費投資達7位數之外，更邀請到曾演過《白蛇傳》白娘娘一角，現已離開粵劇舞台40年嘅江雪鷺擔任藝術顧問，有指施姐曾宣布做完粵劇《紅樓夢》就會收山，施姐就話決定收番呢個決定，因為佢有個新目標就係希望能夠帶領粵劇衝出海外，最希望有朝一日去到拉斯維加斯表演，畀外國人見識下廣東粵劇嘅精髓。