SoulJase簽新公司籌備選秀比賽 望捧潛質新人盼年內C Allstar重聚

C AllStar成員 何建曦 日前舉行迷你音樂會《SOULJASE 2024 Debut live》，吸引近百歌迷到場支持；SoulJase呢日獻唱多首歌曲之餘，仲向大家宣布已加盟新唱片公司。

SoulJase日前於迷你音樂會宣佈加入新公司嘅消息

佢有感以獨立歌手自資出歌，不如以往有公司支持，一切資金、宣傳均要自己出面「敲門」，不過亦坦言係非常珍貴嘅經驗。今次決定加盟新公司，亦係佢脫離C AllStar後首次以男歌手身份簽約，同時亦成為新公司首位簽約藝人。

雖然公司過往以歌曲製作為主，而SoulJase同公司主腦曾合作過多首歌曲，雙方彼此欣賞兼默契十足，故令SoulJase放心決定同行，告別單打獨鬥，佢話：「上年做歌嘅時候，覺得互相啟發到大家，撻返着大家啲火。」

佢仲指出將會籌辦選秀比賽，擔任監製力捧素人，

SoulJase又稱將挑戰新領域，有計劃監製招攬培育有潛質新人，佢話喺網上見到唔少才華洋溢嘅素人，憶起自己學生年代被發掘出道、再登上各大舞台、同專業音樂人切磋嘅經歷，自己亦希望有音樂天分嘅素人都擁有發光發亮嘅機會：「我好想呢班有Potential嘅音樂人，都感受到我感受到嘅嘢。」佢仲透露今年計劃舉辦一個為期半年嘅網上音樂選秀比賽。

又指出希望盡快可以同各位好兄弟再次合體

今次加盟新公司，SoulJase就笑言仍未告知C Allstar各位兄弟：「其實佢哋未知，我諗呢個報道出咗就會知。我未問佢哋意見，我都好期待，睇吓佢哋有咩感覺啦。」而唔少歌迷都非常期禹C AllStar再合體表演，SoulJase就坦言未有計劃，不過就抱樂觀態度：「絕對有機會，睇吓會唔會係今年啦。我都希望可以盡快出嚟，未必一定係做歌，做騷都好。我都期待新公司嚟緊多啲歌手，之後有機會，我可以以C AllStar身份帶佢哋出嚟，咁就Very Good啦。」