黎諾懿盼陳敏之走出喪母之痛 龍婷證實中一生友情深厚

黎諾懿、林子超、李錦聯等一眾藝人以義工身份前往南山邨同老友記們食盆菜提早過年，氹得公公婆婆們非常開心。諾懿好友陳敏之嘅媽媽早前不敵癌魔離世，敏之一時間難以平服喪母之痛。諾懿大讚陳媽媽係一位好母親，亦希望大家可以俾啲時間同空間敏之緩和心情，一班朋友亦會喺敏之身邊。諾懿仲話，大家不必擔心敏之嘅直播帶貨工作有任何影響，事關仲有佢同Yoyo陳自瑤等人喺度。

《中年好聲音》歌手龍婷呢日為老友記們獻唱金曲，令現場氣氛更加熱鬧。近日中一生曹敏寶、梁浩銓被出不倫婚外情緋聞，龍婷對呢單新聞都表示唔知情，自己都係朋友發俾佢先留意到。但係中一生關係融洽，特別係12強選手嘅友情更加深厚，所以龍婷就認為大家都係好好嘅朋友。

見到李錦聯，大家都會以為佢係要準備大展身手整幾味俾老友記品嚐，但呢日佢就唔係廚師，而係歌手！李錦聯笑言要多功能發展，不過佢唱就得，唱跳就未能駕馭得到。