聞未婚妻保釋被拒即時還押 李龍基聲淚俱下承諾不離不棄

現年73歲李龍基嘅36歲未婚妻 王青霞(Chris)日前因為涉嫌在港逾期居留被捕，遭入境處扣查，20號喺沙田裁判法院提堂。早上8點幾，Chris由入境處嘅車輛送抵法院，大約10點幾現身出庭，模樣憔悴，木無表情。

Chris被控6項罪名，包括兩度違返逗留條件、涉及兩間大學嘅虛假文書等等，每項控罪Chris都表示明白，辯方申請保釋但遭法官拒絕，需即時還押，案件押後至4月16日再訊，另於2月28日作保釋覆核申請。

過去Chris同李龍基愛得高調，至最近不斷被揭黑材料，早前已被爆有學歷造假、騙婚、詐財等負面消息，曾自稱透過優才計劃來港嘅Chris如今被起訴逾期居留及多宗控罪。雖然唔少網民對呢段「爺孫戀」都唔睇好，不過李龍基就未受種種傳言影響，一直力撐未婚妻。

身在廣州嘅李龍基受訪時透露，因為要喺內地錄影節目，最快21號先返港，所以未能陪伴未婚妻上庭。佢更聲淚俱下表示擔心未婚妻會入獄，已聘請律師提出抗辯，並隔空表示結婚承諾絕不會變，以真愛為後盾，給未婚妻最大嘅支持鼓勵。

案件編號：STCC/688/2024