劉德華新戲自揭失落影帝心情 導演寧浩斗膽重提隱婚墮馬情節

由 寧浩 自導自演， 劉德華 主演，單立文、林熙蕾 都有份參演嘅《紅毯先生》，29號就喺香港正式上畫。故事內容講述從影40年嘅香港天王巨星劉偉馳(劉德華 飾)為贏得影帝，同導演林浩(寧浩 飾)合作拍攝農村題材影片，因而引發一系列令人哭笑不得嘅荒誕鬧劇。

劉德華主演被加入私生活題材嘅新片於香港上映

戲中劉偉馳嘅經歷，同現實中嘅華仔有唔少相同之處，華仔早前接受媒體訪問時，坦言接拍前有小小擔心劇本，因為電影會勾起自己演藝路上嘅得失，仲特別提到當年失落影帝嘅心情。

當年瞞婚同墜馬等事都加入電影故事當中

華仔2006年投資寧執導嘅荒誕喜劇《瘋狂的石頭》，令寧浩一鳴驚人，今次華仔終於首度主演寧浩嘅作品，寧浩貫徹過往反諷作風，戲中斗膽將華仔現實生活搬上大銀幕，好似墮馬、隱婚等情節，藉此諷刺演藝圈各種荒謬。

片中提到主角非常渴望得獎，不過現實中嘅佢就話早已放下

而華仔都大膽接受導演安排：「其實今次我用一個唔係演戲嘅心態，而係好好地去用自己嘅心情，就是用劉德華嘅心情，去面對劉偉馳嘅人生。」戲中劉偉馳多次失落影帝寶座，求獎心切，而現實中華仔反而早已對獎項無得失心：「因為我真係有好多最後冇得獎，但市場覺得我演得好好嘅戲。《瘦身男女》我記得我輸嘅原因係因為，點解你要瘦返，話覺得我有偶像包袱。」

佢仲話希望外界睇完新片會更明白藝人嘅心態

華仔仲補充話無論得到幾多次影帝，都總會有人批評，所以自己唔會太介意，相信觀眾睇過電影，會更明白影星風光背後嘅故事同心態。