劉青雲試做口述影像員 被視障人士感動至眼泛淚光

劉青雲1月嘅時候開通抖音帳號，佢第一條片就係「市民劉先生」嘅買餸日常，當時有唔少網民都讚市民劉先生夠晒貼地相當親民。

早前抖音就邀請咗市民劉先生拍攝一連六集個人節目《青雲之外》，節目入面青雲話如果呢個世界真係有平行時空，佢好想知道喺另外一邊嘅劉青雲會係做緊啲咩工作，所以喺呢六集節目中，佢會嘗試唔同身份去體驗生活，好似嘗試做口述影像員、雪糕售賣員、一日飛機師體驗、與博士對話、同小學生相處。
青雲去做口述影像員，最後被觀眾感動。
當中青雲為一眾視障人士做口述影像員，當口述完一段短片之後，聽到觀眾拍掌嘅青雲即時雙眼通紅，之後佢接受訪問時講到，自己曾經因為一個角色而去過盲人學校上咗3個月堂，當時佢認識咗唔少同學，青雲話佢啲同學當時要好努力咁為自己嘅明天打好基礎，因為佢哋可能再過多6個月就會完全睇唔到嘢，講到呢度青雲已經眼泛淚光，佢繼續話：「而我呢，我只係去偷點東京來演戲。你能感受他們對命運的反抗是怎樣。」
體驗視障人士感受。
完成口述影像工作後，一眾觀眾分享自己失明嘅經歷，當中有觀眾表示自己未失明前曾經睇過青雲嘅電影，估唔到而家可以見到青雲嘅真人，但自己已經係完全失明，聽到呢位觀眾嘅分享，青雲就再次雙眼通紅喇。

節目入面除咗做口述影像員外，青雲仲戴上特製眼鏡感受視障人士嘅感受，之後佢又分享自己如果真係失明會係點。