張家輝 劉俊謙新戲難逃夢魘 陳法拉一改形象破格演出

張家輝執導嘅最新作品《贖夢》喺香港國際影視展2024釋出首支預告片同海報﹗電影由家輝、劉俊謙、陳法拉領銜主演，袁富華、朱晨麗、李凱賢及袁綺雯助陣參演，許恩怡特別演出，預告片中揭示角色之間命運交織，共同面對夢魘困擾，充滿神秘懸疑感。
 《贖夢》劇照
家輝喺戲中被惡夢纏身，從預告片可見，佢好無助咁向飾演醫生嘅阿謙表示：「瞓唔到覺...我都醒唔返。」而呢句亦令阿謙夢見自己嘅不堪往事。
至於法拉喺戲中亦突破過往斯文角色，以瘋婦形象出現，為要保護家輝所演嘅丈夫而表現得歇斯底里，非常破格﹗
 《贖夢》劇照
至於喺首度曝光嘅電影海報中，展現出家輝喺病床上發惡夢，而法拉就隱藏喺家輝同阿謙之間，暗示三個角色命運相互交纏牽引。而電影一大焦點係家輝同阿謙兩位影帝首次合作，片中更有多場精彩對手戲。喺最新劇照可見，身穿病人服裝，雙手被緊鎖嘅家輝同與阿謙對望，表情充滿神秘感，關係緊張。
 《贖夢》海報
家輝今次更大開金口，親自翻唱王傑經典作《無悔今生》，歌詞揭示戲中佢同法拉嘅淒美婚姻經歷。加上喺預告片片尾閃現連場不安畫面，電影透過強烈的色彩，為戲中角色營造一份凄美心寒感。而且當中人物關係驟看千絲萬縷，令故事更添詭秘﹗