/public/article/images/202403/9a7a0ed9-6d87-4a45-b5db-b5b525dccaf3.jpeg)
《再見‧枕邊人》劇集踏入結局篇，終極Big Boss身份即將曝光，雖然可疑人物愈揭愈多，但亦有角色釋除嫌疑回復「好人」身份！一直為好友楊萬森（馬德鐘飾）跟蹤兼查探晴天（黃智雯飾）嘅「老鬼」魯正輝（徐榮飾），因為晴天「爆大鑊」將當年凱晞建築工業意外嘅絕密錄音公開，令老鬼終得知自己當年因為老友萬森一己私心而白白坐咗兩年冤獄，佢太太仲喺期間因病離世，令老鬼被囡囡佩珈（史穎喬飾）視為最大仇人，因而變得叛逆。老鬼得悉真相後怒氣沖沖搵萬森對質，兄弟情決裂！ 
當年老鬼叮囑楊萬森一定要尋回部手機。
凱晞建築工業意外嘅絕密錄音就 喺部手機度！
直到噚晚（27號）一集，佩珈睇到晴天報道後得知爸爸原來先係受害者時，即下廚煮「媽咪牌」咖喱孝敬爸爸，兩父女相隔多年後終於冰釋前嫌，老鬼自責地向佩珈道歉：「以後有老竇照顧你，你唔使再一個人……以後有老竇，我會十倍補償番畀你。」佩珈就好激動鬧爆楊萬森做「賤人」：「都唔關你事！你明明係受害者，係你嗰個所謂嘅好兄弟累到你坐監，累到我哋屋企搞成咁，係呢個賤人呀！」最終老鬼因為知道萬森一直借鐘點工人麗姐張相假扮係佩珈嘅「大姑媽」，一直喺佩珈身邊默默支持同打氣時，亦決定原諒萬森。
佩珈睇完晴天報道後，向爸爸道歉。
徐榮指演「老鬼」一角有難度，因為佢一直視萬森係好兄弟，到頭嚟發現自己被利用，要喺極短時間入面突然轉變心態並唔容易；徐榮續指當咗爸爸後，對演出爸爸角色有幫助：「因為會有少少代入咗，如果真係自己，會點呢？情感方面係會有幫助。同埋我覺得小朋友真係需要父母陪伴多啲，因為史穎喬呢個角色就係老鬼冇陪佢，媽咪唔喺度令佢性格變得反叛同孤僻啲。」
徐榮與馬德鐘三度合作「人字」劇集系列，默契十足。
佩珈鬧爆楊萬森係賤人！
老鬼知道萬森當年好照顧佩珈，同埋佢嘅苦衷後原諒咗對方。
《再見‧枕邊人》結局篇｜逢周一至五晚8點半翡翠台播映
