吃貨橫掃深圳丨梁凱晴享受希臘風情 彭慧中歎日式溫泉水療

北上食玩指南《吃貨橫掃深圳》，四位主持陸浩明（6號）、彭慧中、林秀怡同梁凱晴，將會帶觀眾去到深圳掃貨嘅新熱點、去倉庫式超市搜羅網上大熱產品，當然唔少得為大家「開箱試伏」啦！
四位主持去深圳覓食。
喺8 號晚播出嘅一集，主持們會帶大家食盡北京、潮汕、江南等地菜式，由杭州風靡至深圳嘅「蟹黃瀑布」，主打邪惡蟹膏撈麵或白飯，每碗招牌蟹黃都用10隻蟹新鮮拆製，超足料而且啖啖蟹肉蟹膏，套餐只係要99蚊人民幣！
極邪惡嘅「蟹黃瀑布」。
之後又會去到地鐵僑城東站附近品嚐老北京菜，佢哋主打嘅烤鴨酥而不膩，加錢仲可轉為魚子醬烤鴨，中間薄薄一片芒果有助解膩，濃郁烤鴨味道中帶點清新感覺。呢集仲會去試手切潮汕牛肉河粉，河粉由磨米打醬、再放置竹箕蒸煮，食客仲可以睇住整個人手製作過程。
 佢哋又會去食老北京菜。
香港人鍾意做按摩水療，近年內地水療中心出現2.0版本，當中設有蒙古包汗蒸幕、膠囊太空艙等，唔使坐飛機都可以體驗日本溫泉度假村享受。彭慧中同梁凱晴就親自體驗有助促進血液循環、舒緩繃緊肌肉嘅水療浸浴；而6號同林秀怡試玩有效排毒美顏、釋放壓力嘅汗蒸幕。
6號同林秀怡試玩有效排毒美顏、釋放壓力嘅汗蒸幕。彭慧中體驗日式水療浸浴。
9號晚播出嘅一集，三位女主持將會介紹網紅打卡熱點，帶大家一秒由深圳到歐洲！白牆嘅獨棟建築充滿希臘風情，推開房門直接落水，呢種洞穴游泳房型海景民宿入住一晚唔做2000蚊人民幣，費用仲包埋早餐、下午茶同埋20分鐘攝影師服務。
梁凱晴帶大家去洞穴游泳房。
去完歐洲後，主持們會同大家去嘆「點心界天花板」、荔枝木炭燒走地雞、無花果雞煲、潮州打冷等，而甜品方面有草莓抹茶梳乎厘雪糕，人氣程度連平日都要排成個鐘！
 逛倉庫式超市。逛倉庫式超市。
另外，倉庫式超市更成港人掃貨新熱點，主持們入場搜羅網上大熱產品為大家「開箱試伏」，當中有草莓忌廉包、Tiramisu、黑松露意粉、鮑魚雞湯湯包等，想知道佢哋有冇中伏？就要收睇《吃貨橫掃深圳》喇！

《吃貨橫掃深圳》逢星期一至三 22:30 翡翠台

當然唔少得試伏時間。