公屋上樓 | 獲派健明邨如中頭獎🏘️ 房署一個原因不准簽約兩母子憂瞓街

一名女網民日前在Facebook群組「公屋討論區」中發帖，表示本月2日收到房屋署的配房信件，獲派調景嶺健明邨單位，翌日（3日）已到單位視察，一家人均接受配房，直言「感覺真係中咗頭獎咁」，然而房屋署職員卻不讓他們簽約。

事主解釋家中有輪椅人士，指輪椅人士已親身到單位視察，認為位置和空間都無問題，已向大廈主任提出會接受單位，亦會自行安裝斜台和扶手，但主任要求輪椅人士安排職業治療師共同視察。

如是者，事主已跟職業治療師見面，讓對方查看單位的照片和影片，治療師看後也認為毋須作出大改動，僅建議在浴室安裝扶手，「而這個我哋可以自行安裝到的，但主任仍未畀我哋簽約住」。

（Facebook圖片）

憂遲遲未能入伙「瞓街」

對此，事主透露現住單位的業主要收樓，如他們遲遲未能簽約「上樓」，未必趕得及在收樓前遷出，「我搵到治療師都未必趕得切收樓前遷出，一陣會再去房署搵主任傾，如果仲未肯畀我簽約，我同我仔瞓街了......」事主亦不解為何房屋署職員不容他們入伙後再裝修，「我就係唔明白單位調適點解唔可以遷入後做，而要一等再等。封信下部都有寫唔安排治療師察視，若拒絕視為一次派屋，但係我哋係接受，又唔需要佢哋做調適，都要拖。如果佢哋工程人員幾個月都嚟唔到裝個扶手，我哋咪要再等多幾個月？唔想呀」。

事主直言只希望在過年前入伙，並詢問網民「如果職業治療師冇建議任何改動，是不會發任何信件畀房署的，咁其實係咪可以唔需要治療師睇咗先簽約呢？」、「如果治療師只在報告中寫上在浴室加裝扶手，而我哋又可以自行安裝，咁係咪都要等房署安裝咗先呢？」、「其實冇大改動，我哋又接受該單位，有冇可能可安排盡快簽約呢？」。

網民：過年前可能好趕

帖文曝光後，不少網民分享自己的經歷，指一般都要職業治療師上門視察才可簽約，「我嗰陣有年老親戚係要喺廁所幾個位置裝扶手，職業治療師要去度親戚嘅高度，仲有畀尺寸高度房署裝，房署先搵人去裝，唔畀自己裝，因為怕個物件裝唔穩同破壞咗廁所個防水層，所以要等佢嚟裝。過年前可能真係好趕，工程嗰啲未必咁快嚟到裝」、「要同房署傾吓，嗰陣個親戚都搞咗成個月先返得屋企」、「治療師睇先搵房署安裝，你先可以簽！」、「一切要等房署及治療師安排好先會畀你簽，這是程序，程序是一步一步來的，與你過年前想搬入係2件事，明白嗎」。

【延伸閱讀】

公屋上樓 | 等9年首派大窩口邨250呎單位 港男點出3大問題猶豫：有啲頭痕

舉報濫用公屋獎3日收200舉報投訴 今年內立法刑事化可望成事

房署揭兒子擁私樓單位🏘️ 媽媽遭取消居屋申請憂失公屋兼被告