Koba逝世｜停工眾籌醫藥費仍出席節目 樂觀面對日益嚴重病程

J2節目《不正常愛情研究所》主持文頌男（Koba），於去年確診罕見的尤文氏肉瘤（Ewing's Sarcoma）後全面停工，當時他發起眾籌，之後亦收到香港演藝人協會及會長古天樂捐款，上月再獲已故天后梅艷芳生前好友連炎輝安排專車接送他往返醫院，可惜他仍未能敵過病魔與世長辭，令人惋惜。

文頌男確診後無奈需要停工，發起眾籌應付日常開支及醫療費。查小欣上月曾於報章專欄透露，梅姐生前好友連炎輝得知此事後，安排專車接送Koba往返醫院。之後文頌男亦於社交媒體撰文感謝連炎輝，指「呢段時間真係要多謝好多人，好多好好心幫助我嘅人。最近特別要感謝嘅就係連炎輝先生。佢透過報到了解咗我嘅故事，知道我行動不便，特別安排專車畀我接送我外出」。

直至今日晚上，相信由他生前親自撰文、分享逝世消息的文章，在文頌男的社交平台出現，宣布他已經逝世，終年29歲。

文頌男早於本年3月接受本地報章訪問時指，自己由發病起至今年4月已停工大半年，無奈經歷五次化療後，於3月時已宣告治療無效，椎間近盤骨的惡性腫瘤疑有增大跡象。

當時文頌男面對痛症的日夜煎熬，以及藥物副作用，而嚴重影響生活，他坦言的確是度日如年，對前路感到徬徨，但仍會積極對抗病魔。另外，他亦在訪問中感戲媽媽，指她獨力養大一對子女，終於捱到自己取得藝術管理及藝術教育雙學士資格。

而年過60的文媽媽自Koba病發後辭去日間工作，每日晚上8時至清晨6時則做清潔工幫補家計。一場大病令他頓覺，家人和朋友無私付出的可貴，亦真正領悟到「活在當下」。

而於治療期間，他曾於今年1月參與了兩集《不正常愛情研究所》的錄影，節目於3月播放。他亦於IG轉發相關報道指，「拍到眼濕濕，希望有機會再喺電視同大家見面」，並指表示自己並非復工：「大家誤會喇！唔算係復工，嚟緊會播出嗰兩集《不正常愛情研究所》，有我份係1月嘅時候拍㗎喇，喺我狀態好啲嘅時候返咗去開一日廠」。


文頌男Instagram宣布死訊全文：

好抱歉，喺呢度要同大家講一啲好沉重嘅事。當大家睇到呢一篇文章嘅時候，我已經離開咗人世。

呢幾個星期以嚟，我一直努力接受自己身體上嘅變化。呢段時間，我選擇咗唔對外透露自己嘅病情，亦冇同任何傳媒交代，因為我未有勇氣去接受呢啲變化。

其實，早喺2024年6月22號，我就因為下半身完全癱瘓、完全郁唔到、冇任何知覺而入院。呢個情況亦令我排唔到尿，所以當時要緊急送入醫院。

自從入院以嚟，到我撰文呢一刻（2024年7月10號），已經接近三個星期。唔好講病情冇好轉，反而越嚟越差。胸口以下仍然係完全冇知覺，完全控制唔到排泄功能，需要換尿片同埋插尿喉。癌細胞已經擴散去好多唔同嘅位置，例如胸、肺、多個脊椎、淋巴，甚至有啲腫瘤我可以喺外部摸到。有知覺嘅地方都感覺24小時都好痛，例如肩胛骨、頸椎、頭皮。

我仲有氣促，心跳長期偏快，依家要吸氧。每朝早都會有發燒嘅感覺，不過量體溫就量唔出發燒，而且仲會覺得好凍，但就出曬汗，身邊嘅人感覺我發緊熱。

醫院已經開咗好多唔同嘅藥畀我，不停調整劑量，雖然有抑制到大部分症狀，但仍然都係好辛苦、好唔舒服。

醫生同我商量過，再做康復治療都冇作用，只能夠做一啲舒緩性治療，見到有咩症狀就做相應治療抑制住佢，等我過得冇咁辛苦。簡單嚟講，依家就係等緊死，純粹希望死得舒服啲。

喺人生嘅最後一哩路，非常感謝親友同各界人士一直以嚟嘅支持同關心，呢段旅程有你哋陪伴，我感到無比幸運同感激。