張敬軒美加巡迴遇着微軟全球死機？外藉歌迷合唱廣東話版《餘震》超正

日前，張敬軒正式展開「The Prime Classics HINS CHEUNG LIVE張敬軒演唱會」美加巡迴站，首站於美國拉斯維加斯舉行，這亦是繼去年倫敦三場、澳門十四場後，第十八場「The Prime Classics」的演出。

作為美加巡首站，這次場地位於拉斯維加斯Caesars Palace的The Colosseum，以往有不少國際級歌手曾於這個場地演出，如Celin Dion及去年軒仔來看她的show的Adele，絕對是殿堂級的場地。難怪軒仔表示既榮幸又興奮，「今晚可以企喺呢個舞台上面，好開心，我仲用Adele嘅化妝間同埋坐佢張櫈㖭呀！」

雖然相距一年再於拉斯維加斯開show，再加上日前微軟死機，令各地機場大癱瘓，但各地歌迷如紐約、芝加哥、洛杉磯、西雅圖及墨爾本等，依然排除萬難到場睇show，軒仔十分感謝，「多謝大家不理千里、萬里嚟到拉斯維加斯嚟睇我嘅演出，知道增加咗佢哋嚟嘅難度，有啲要飛廿幾個鐘、有啲飛咗去某個地方，然後要坐十個鐘頭車到，各式其適以唔同嘅方法抵達演唱會場地，好彩大家都可以齊齊整整嚟到。」

當晚演唱會歌單除了新歌《青春告別式》，亦有不少軒仔的代表作，如《櫻花樹下》、《笑忘書》、《餘震》等，都變成「大合唱環節」，當大合唱完《餘震》後，軒仔興奮地說：「你哋知唔知啱啱嗰刻知唔知發生乜嘢事？我喺台度，好多朋友同我一齊唱呢首歌，突然之間見到呢位外籍女士，佢識唱《餘震》呀！佢真係好犀利！突然間令到我覺得自己好似一個外國明星，好犀利呀！我第一次見到有外籍人士唱我啲歌，除咗我『遮遮』之外。好神奇！我想話，你（外藉女士老公）都真係好有福氣，你老婆愛你愛到連廣東歌都學。」隨即全場歡呼。

演唱會亦有落台握手環節，不過落台前，軒仔語重深長地着歌迷要冷靜一點，原來因為去年新加坡站的「陰影」，更笑說大家不用錫住他，最緊要錫住支咪，「上次我哋喺新加坡，因為大家太熱情已經撞跌我支咪，我支咪特登send去德國整，整咗我兩隻勞力士嘅價錢，希望陣間大家唔錫住我唔緊要，一定要錫住我支咪，知唔知？我好易搞嘅啫，但係我支咪難搞。」歌迷亦十分聽話，最後軒仔人咪安全返回台上。

張敬軒演唱會美加巡迴站張敬軒演唱會美加巡迴站張敬軒演唱會美加巡迴站