森美小儀皇牌節目《早霸王》瘋傳八月初停播？本尊親解「執笠」傳聞究竟所為何事

森美小儀主持商台叱咤903節目《早霸王》，在早上時段播放多年超受歡迎，儲落好多粉絲！不過，有傳該節目將於八月初停播，並會有新節目接力出街，究竟所為何事？今早森美小儀開咪期間，本尊亦有回應事件，原來只是虛驚一場，大家唔使驚呀！

有網民在「全港店舖消息(開張/執笠)關注組」發文指，森美、小儀及梁嘉琪主持的《早霸王》節目，有傳將於8月5日執笠；另有網民在其他網頁亦有指出：「8月5號開始903係咪無《早霸王》？聽到有新節目《今朝多珍重》。」網民知道消息後掀起熱議，紛紛留言表示：「吓！早霸王都可以執？」、「拆夥？」

直至今早，森美小儀在今早《早霸王》回應瘋傳節目停播一事：「應該都冇乜地方可以去㗎喇，冇㗎喇。節目表每個時間都好穩定，監製同我哋講唔使做，我都心裏面諗：『係時候可以退休喇』。」豈料，森美繼續發表：「監製之後話『到時好似有半個鐘頭，你哋唔使做。』」

原來這樣，不過對於新節目內容，森美則相當保密：「嗰半個鐘頭邊個做，我唔喺度講、唔講得，只能夠我知咁多講咁多，因為啲人係咁問我，我又唔想唔講。」森美時指自己未露透露太多，怕會被人炒魷魚：「我講嘅嘢全部都係事實，今朝先話到畀你聽。監製冇叫我講，冇人畀我講，我只可以講到咁多，如果唔係我真係俾人炒。」

小儀隨後大爆，早有高層在宣傳聲帶出街前，已着她提醒森美：「喺呢個宣傳聲帶之前，即係我哋節目將會俾人霸咗呢個時段之前，有個高層同我講：『嗱，我哋嚟緊有個咁嘅promote出街，你可唔可以幫我同森美講，話定畀佢聽，我驚佢啲朋友聽完，話畀森美聽，佢會驚』。」森美則霸氣回應：「你話返畀個高層聽，真係未驚過。」