你好，我的大夫︱今晚大結局蔡思貝委屈爆喊戲超搶 李成昌演神怪露宿者獨白戲晒層次式演技

TVB熱播劇《你好，我的大夫》，今晚將會播出大結局。而昨晚（12日）一集高潮迭起，本身已因病患突發性心臟病離世惹上官非的嘉應(蔡思貝飾)，遭媒體陷害誣衊、大字標題嘉應是劣跡斑斑的殺人兇手之餘，更連嘉應爸爸程醫師（陳嘉輝飾）也拉落水，指行山時突發性中風失救的他同樣是神棍中醫，無限自責的嘉應即崩潰爆喊。

相關場口思貝全程哭得像個做錯事的小朋友之餘，眼淚鼻涕更是瀑布式落下，感染力強。連番受挫的嘉應，還被清勁發現口腔嚴重潰爛，身心陷入嚴重危機……今晚嘉應除了會上庭接受聆訊，困擾其多年的心魔亦會終極解開！兜兜轉轉的「勁應CP」能否修成正果？大結局自有分曉！

昨晚另一驚喜，是無綫超強綠葉李成昌，客串飾演神怪露宿者阿柏一角，劇情講述嘉應停職期間於橋底義診幫助貧苦大眾，其間阿柏不但不領情，更鬧爆嘉應超現實：「畀老鼠咬死喺出面仲唔係大新聞？喺呢度冇人理架。呢度係人間地獄，你何德何能妄想喺度做救世主？餓嘅餓、病嘅病、死嘅死，你救得幾多個？你又幫得幾多個？傻嘅！」老戲骨昌哥不但句句鏗鏘有聲，而且短短45秒獨白戲已畀足層次，微表情變化更是細緻入微，渾身是戲。