將於5月13號晚首播嘅劇集《家族榮耀之繼承者》,一眾演員 佘詩曼 林峯 羅子溢 黃浩然 陳瀅 許紹雄 余安安 龔慈恩 程可為 劉江 梁靖琪 艾威 劉浩龍 同 梁諾妍 等,呢日就齊集電視城為新劇造勢記者會。
喺劇中飾演二少奶嘅余安安,話自己係首次飾演咁乞人憎、巴辣嘅角色,講到劇中佢要掌摑佘詩曼,安安姐第一句就話:「爽呀!嘩,摑佢一巴幾爽呀!」不過佢話自己打完阿佘呢巴其實好心痛,又指拍攝前佢兩個已經溝通好,只會摑一次,但呢一次係要狠狠咁摑唔好NG。安安姐仲話當下摑完旁邊嘅人都嚇到呆咗。而阿佘就講笑話本身自己右邊面肥啲,上鏡會鴛鴦面,但畀安安姐摑完之後就balance返呀。
羅子溢話自己今次喺劇中飾演一個滅絕人性嘅奸角,又風流又下流,佢笑言演呢個角色都幾好玩,因為可以攞正牌做好多壞事,將平時嘅壓力發洩,身邊嘅阿佘同林峯聽完即刻忍唔住問子溢:「好大壓力咩你?」令全場爆笑。
再次同阿佘合作嘅林峯,笑言自己喺劇中主要係同阿佘拍拖,但佢話佢哋嘅感情唔算太順利,而自己可以話係渣男,又可以話係暖男,相當矛盾。雖然畀阿佘形容為「先渣後暖」,但係林峯話自己喺劇中由始至終都只係鍾意阿佘一個,同時佢又好羨慕劇中有好多對手同激烈場面嘅子溢,笑言自己十幾套劇加埋都冇子溢一套咁勁。
自言首次喺劇中被陷害得咁慘嘅阿佘,笑指好彩呢日羅嘉良未有出席,因為佢話而家見到子溢同嘉良兩父子一齊都有陰影。飾演阿佘媽媽嘅龔慈恩,笑言除咗好開心有阿佘呢個咁靚嘅女外,佢仲話自己係本色演出,好有智慧咁喺劇入面飛咗許紹雄。做阿佘護花使者嘅黃浩然,就指每次自己嘅出現,都係推進所有劇情嘅發展。
喺劇中同子溢有唔少情慾戲嘅梁諾妍,就話老公洪永城知道晒佢啲戲份,亦因為對手係子溢而好放心。飾演富二代沉迷玩樂嘅梁靖琪,笑言自己一切嘅行為都係被縱出嚟,唔關自己事。陳瀅話自己喺劇中係最冇地位、最不被人愛錫嘅一人,佢話喺劇入面要喺眾人面前講三頁紙嘅法律用語,令佢相當大壓力。至於戲中飾演Andy Lau劉Sir嘅劉浩龍,話自己從演以嚟終於都有感情線,不過只係暗戀呀。
《家族榮耀之繼承者》5月13號起 逢星期一至五晚 20:30 翡翠台
![東張+ | myTV SUPER 24小時即時新聞 本地、國際時事熱話 東張+ | myTV SUPER 24小時即時新聞 本地、國際時事熱話](/tc/scoopplus/img/logo.png)
登入後即可查看我的收藏
登入後即可查看瀏覽記錄
![myTV SUPER myTV SUPER](/tc/scoopplus/img/img__header_superlogo.png)
![myTV SUPER myTV SUPER](/tc/scoopplus/img/icon__header_gosuper.png)