電影泉攻略丨《警長：捉內鬼》大馬勁收過億票房 導演望與曾志偉合作丨EP106

王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。

《變形金剛：狂獸崛起》彩蛋見到變形金剛同《義勇群英》crossover合拍電影，有傳電影公司有意邀請「雷神」Chris Hemsworth加盟呢部電影，Chris之前曾喺《變形金剛》動畫作品聲演柯博文，有傳史提芬史匹堡同Michael Bay有機會參與。

本周新片速遞有《重案夢幻重組再重組》由韋史密夫同馬田羅倫斯再度合作，再次帶嚟連環驚險動作場面與抵死惡搞爆笑時刻，佢哋又再飛車出動掃毒，點知被人設局陷害，一晚之間淪為被追捕嘅危險逃犯，鬧出更多瘋狂笑料！

《窺探者》講述藝術家Mina被困喺愛爾蘭西部一片廣闊荒涼、未受破壞嘅森林之中。當佢排除萬難搵到藏身之地，卻不知不覺間跟三個陌生人一同受困，每晚受到神秘生物監視及跟蹤，處於極度恐懼之中。

《警長：捉內鬼》講專門襲擊販賣冰毒嘅殺手橫行霸道，差館懷疑有內鬼所做，空降猛料治安官「警長」逐一大搜查，連同黑幫大佬亦身陷局中局，驚人真相反轉再反轉…呢部電影喺馬來西亞已衝破過億港幣票房，導演撒齊尤索夫指本身鍾意睇香港警察故事電影，佢最鍾意睇《無間道》，撒齊尤索夫亦好想同許多國際演員合作，佢想同曾演《無間道》嘅曾志偉先生合作，覺得對方係一位多才多藝演員。

票房龍虎榜截至6月5號中午，第三位《猿人爭霸戰：猩凶帝國》，第二位《芙莉歐莎：末日先鋒傳說》，第一位《九龍城寨之圍城》。