電影泉攻略丨假設外星生物侵襲地球 Joseph Quinn自嘲生存唔到15分鐘丨EP109

王鎮泉 Jeoffrey  每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲，今集Jeoffrey除咗同大家介紹港澳首家杜比影院（Dolby Cinema）嘅體驗外，仲有《無聲絕境外傳：首襲日》兩位演員 Joseph Quinn同Lupita Nyong'o 嘅訪問。

今次電影入面兩位演員就要同一隻專業貓演員一齊演出，Lupita 笑言貓咪係一種不可思議嘅生物，佢又指兩位貓演員喺片場中有好多令人驚喜嘅地方，覺得佢哋彷彿係跟到成齣戲嘅劇情發展，令佢覺得好值得讚揚，不過同時佢哋都要滿足貓咪嘅需求，因為貓咪喺片場經濟都係處於精力充沛嘅時間。而Joseph就笑言喺片場時，已經唔知貓咪嘅主人係邊個喇。

之前喺《黑豹》入面Lupita就已經做過大量嘅水底訓練，所以佢話今次再喺水底拍攝，對佢嚟講可以話係易如反掌，不過Joseph就話對佢嚟講就係一個全新體驗，因為之前佢係完全未試過，拍攝時亦喺Lupita身上學到好多，同時都相當有挑戰性。  

講到劇中成日再維持佢哋嘅驚恐情緒，Lupita笑言有時拍拍下會覺得好儍，因為拍攝現場根本一啲都唔可怕，喺攝影機後會見到工作人員一直忙緊，好多人行嚟行去，但佢哋就要保持住驚慌狀態，所以好考佢哋嘅集中力呀！

假設電影嘅橋段真實咁發生喺現實生活，Joseph就話自己一定唔會係出色嘅倖存者，佢笑言自己可能頭15分鐘都已經撐唔住，所以覺得自己唔會生存到太耐，不過當拍完呢齣電影後，佢覺得自己可能可以照顧好自己。