電影泉攻略丨《玩轉腦朋友2》北美開畫創票房佳績 香港7月暑假檔期上映丨EP108

王鎮泉 Jeoffrey  每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。


日本人氣動漫《我的英雄學院》第七季已經如火如荼播映中，今年年頭仲宣布要製作最新嘅劇場版，日前亦都推出預告片，今次係我英嘅第四部劇場版，劇情主要圍繞住一個叫Dark Might嘅大反派，另外仲有一名神秘新女角，兩人之間應該有所關連，電影預計八月份就會喺日本上映。

而由Disney同Pixar聯合炮製嘅《玩轉腦朋友2》上星期登陸北美，首週票房已經達到1.55億美元，成為動畫史上最高開畫票房第二位，僅次於2018年嘅《超人特攻隊2》。而影評方面都一致讚好，喺著名影評網站爛番茄同IMDB都獲得高分，外界預測呢部電影應該可以輕鬆突破5億美元票房，香港就會喺七月暑假檔期上映。

本週新片速遞有《加菲貓：勇闖世界》，講述全球知名大食懶加菲貓，每日足不出戶嘆pizza同千層麵，點知有一晚佢同狗狗阿的一齊被神秘人綁架，過程中仲意外撞返失散多年嘅爸爸阿肥，於是展開連串爆笑瘋狂冒險。

《汪汪夢裡人》榮獲奧斯卡最佳動畫長片提名，講述單身狗狗厭倦獨居生活，於是購買智能機械人陪伴，不過因為一次意外將佢地拆散，究竟佢地有冇機會重新遇上呢？

《地下殺神》講述一名無名小子經常戴住面具流連地下格鬥場，但事實上佢正計劃向殺母仇人報仇，並且誓要打敗腐敗領導人，希望可以救助窮人同弱勢。

至於本週嘅票房龍虎榜截至6月19日中午，第三位《重案夢幻重組再重組》；第二位《九龍城寨之圍城》；第一位《談判專家》。