胡鴻鈞首次大馬開騷唔夠喉 自讚喜感高期待出演真人騷

胡鴻鈞 赴馬來西亞開騷同歌迷見面，演唱會日前圓滿落幕，呢次係Hubert於大馬首次開個唱，所以喺歌單編排上都誠意十足，精心挑選咗《到此一遊》、《如這麼愛他》、《足夠》等歌曲，務求滿足歌迷耳朵，令全場觀眾非常投入。

完騷後Hubert表示能夠到大馬開騷格外興奮，與歌迷同步夢想成真一樣，完騷一刻仲覺得唔夠喉，希望儘快可以再到當地同歌迷見面。Hubert又自爆好多歌迷關注佢會否再出廣東歌，佢向大家派定心丸承諾適當時候必定會以廣東歌同樂迷見面，只是近期佢集中火力製作國語歌，呢個亦係佢渴望已久想做嘅事情，現在有時機便好好把握。

Hubert喺大灣區人氣極高，一眾粉絲都好期待Hubert可以亮相更多內地綜藝節目，Hubert透露早前首次參與內地真人騷節目後，覺得自己好適合，更自讚為人有喜感，呼籲各單位及導演可以搵佢上節目，無論唱歌或玩遊戲佢都一樣有興趣。

難得到訪大馬，Hubert喺開騷前都有喺酒店附近四圍行吓，但就未有充裕時間可以遊歷大馬，只可以品嚐到簡單食物，佢希望第日有機會逗留多幾日大飽口福，可以去景點打卡以及食榴蓮同飲肉骨茶等美食。