父親節專題｜鄭俊弘何雁詩子患罕見病 天使在身邊求各界理解減歧視

每位父親最渴望嘅相信都係子女健康長大，不過今年父親節前夕， 鄭俊弘 同 何雁詩 就決定向外界公佈，囝囝 鄭讚廷 患有罕見病「天使綜合症」，決定舉辦慈善音樂會，期望可以藉住藝人身份，令外界更為關注同理解病童同患者家屬面對嘅情況。

Fred同Step近日接受 許文軒 專訪，提到Asher嘅笑容係令佢哋暫時忘憂嘅重要回饋，亦坦言公開一家人嘅秘密之後，心情可以話放鬆得多。重提Asher成長時發現發展有問題，醫生建議基因檢查之後，發現Asher確診天使綜合症呢個罕見疾病。

夫妻接到消息，Fred一時難以接受，更形容自己絕望同唔願意同外界接觸，當時更非常自責，更每日以淚洗面。

媽媽Step指見證每星期Asher嘅少少進步已係最大嘅鼓勵，雖然生、心理上都需要全天候警戒隨時候命，而家人亦都全力支持小朋友嘅成長同治療。

俗語有云父母長憂九十九，如果小朋友患病擔憂只會加倍，身為公眾人物難言之處就更多，Step指決定公開囝囝病情，係希望聯合更多力量，令各界更加關注病患組織，令病者同家人可以互相關懷同減少唔了解引起嘅不必要歧視。

為骨肉付出能力內嘅所有，Fred同Step面對未知坦承難以長遠鋪排，只求小朋友開心快樂就足夠，雖然Fred同Step指婚後早有生兩胎嘅打算，不過目前面對Asher成長帶來嘅崎嶇，呢個諗法依然未有改變。