鍾柔美新歌拍MV一改乖女形象 主動女追男尋求突破

鍾柔美（Yumi）啱啱完成DSE考試，放鬆心情周圍玩，同時重投工作為新歌《Crack!》拍攝MV，為配合新歌突破框架，Yumi一改平日乖女形象，以運動型格造型拍攝，兼且首次踏足漫畫租書店取景，Yumi入到租書店感覺好特別好靚。

當主播王鎮泉（泉叔）問到學霸係咪唔睇漫畫，Yumi就話自己係好少睇漫畫。導演搵嚟17歲男模賴博文（Owen）擔任MV男主角，Yumi笑指埋位前先初次見面，喺導演要求下有傾偈互相認識。MV劇情要Yumi採取主動女追男，Yumi坦言心底有啲怕醜。講到MV可能需要有啲親密鏡頭，Yumi都有聽聞過，自己順其自然盡量去演。