謝霆鋒為添角色剛陽味 開拍前一年已鍛鍊身型

謝霆鋒為新作《海關戰線》首次身兼男主角及動作指導，除咗設計具官能刺激嘅視覺效果，佢亦提升自我要求，以應付連場高難度演出，早喺開拍前一年，霆鋒已經開始鍛錬，有計劃地將狀態操到最fit。正式開機前，霆鋒仲影底一輯Man爆寫真，霆鋒：「今次確實係我對身體要求比較高嘅一部電影，始終主題有關紀律部隊，一定要以最佳狀態上陣！」

成個鍛鍊計劃，無論飲食、練拳、健身，霆鋒都自我要求嚴謹。練得一身橫練肌肉，問到有咩秘訣？霆鋒：「沒有什麼秘訣，最重要食得好清淡，因為電影有好多動作場面，一定有足夠運動量，主要係飲食方面，我哋有好多夜戲，連續通宵咗三個禮拜，但凡捱夜都會想食嘢，無論你點樣維持，都好有難度！」霆鋒採取忍字訣，再配合大量動作戲，加上之前刻苦訓練，先練出完美體態。