劉俊謙拍台劇首次跟許瑋甯張孝全合作 蘇慧倫藤岡靛驚喜回歸

劉俊謙憑新戲擄獲唔少「劉太」，佢嘅人氣仲殺入台灣，呢日佢同張孝全、許瑋甯、蘇慧倫、藤岡靛等，為有份參演嘅台劇宣傳，喺劇中飾演基金會執行長嘅劉俊謙，呢次最大嘅考驗應該係要講大量標準又流暢嘅國語對白，所以劉俊謙花咗唔少時間努力去揣摩，佢仲搵朋友嚟教佢，希望講得自然啲。
 
劉俊謙呢次首次同瑋甯合作，兩人都係怕醜底，要拉近彼此距離都唔係咁容易，劉俊謙就話佢嘗試用舞台劇嚟打開兩人話題，就咁樣慢慢就熟絡咗。

呢部劇既第一季，張孝全已有份參演，佢同劇中女兒李沐之間，有唔少沉重口嘅對手戲，現實中都係爸爸嘅佢，喺投入角色方面應該更有感受，好似講到劇中女兒小孟同佢講要離家出走一幕，孝全話佢絕對可以理解，因為自己小時候都有類似經驗，所以佢覺得只係成長嘅過程。

而相隔11年，日本男星藤岡靛再次回歸台灣拍劇，佢都話要時間適應下，尤其要應付大量中文，對佢嚟講都係一個難關，所以佢話啱啱睇到劇本一刻都有啲被嚇親。

已經有12歲冇拍劇嘅蘇慧倫，為咗全心全意投入角色，竟然搬屋拋夫棄子，認真大犧牲，而講到整部劇邊一幕最難忘？慧倫就話自己駕車營救孝全一幕，佢話好彩自己嘅駕駛技術一向都唔錯，所以演起上嚟都得心應手，仲覺得自己好型添！